Nork jarri zituen Donostian Espainiako erregearen ongietorri kartelak?

Atalak: Herritarren aldarrikapenak

[Lander Arbelaitz] Udaleko langilez jantzita zihoazen bi lagun, bi kartel, markesinak irekitzeko giltza eta ekimenaren argazki batzuk nahikoa izan ziren DSS2016EU-k Felipe VI Espainiako erregea gonbidatu zuela eztabaidagai bihurtzeko. Bideo baten bidez street art ekintzaren irudiak argitaratu dituzte, Pentsatu, ez sinistu lemapean. Bideoa Europako Kultur Hiriburutzarekiko kritikoa den DSS2016, Donostia $aldu eta Suntsitu kolektiboak sinatu du.

Joan den asteazkenean Donostiako hainbat lekutan iragarki ofizialak bailiran, Donostia 2016ren kartelak agertu ziren. “¡Bienvenido!” handiz, ongi etorri, bienvenue, welcome txikiz, Espainiako erregearen figura nabarmentzen zen bi markesinatan. Ez zela fotomontaia agerian uzten zuten puntu ugaritatik ateratako argazkiak polbora bezala zabaldu ziren whatsapp, telegram eta sare sozialetan, harridurak, eztabaidak eta haserrea eraginez jende askoren artean.

Sare sozialetan sortzen ari zen saltsaren aurrean, @DSS2016 kontu ofizialetik kartelen egiletza ukatzen hasi zen, egoera deserosoan geratuz, kartelak faltsuak izan arren, ostiralean Espainiako errege erreginak gonbidatu zituztela agerian geratu baitzen.

Gaiak dimentsio handia hartu zuen eta Donostiako alkate Eneko Goiak ere adierazpenak egin zituen gaiaren inguruan.

Era guztietako iritzi eta teoriak zabaldu ziren sarean, tartean, kartel horiek jartzea defendatzen zuten batzuek ere.

Azkenean ostiralean Donostiara Espainiako errege-erreginak gonbidatuak izan zirela agerian uzten zuten dokumentuak zabaldu ziren, bisita hau arbuiatzen zutenek egindako deialdiak nabarmenduz.

Egunkari, telebista eta irratietan kartelen egiletzari buruz asko espekulatu ostean, ekimen artistikoaren bideoa zabaldu dute.