Hainbat fotokazetari kexu, 2016ak ordaindu gabe erabili nahi izan dituelako euren argazkiak
“Bakearen milia” erakusketak hainbat argazkilariri bidalitako mezua zabaldu denetik, polemika sare sozialetan zabaltzen ari da eta profesional batzuek uko egin diote egitasmoan parte hartzeari. Mezuan irakurtzen denez, erakusketaren antolatzaileek fotokazetariei eskatzen diete euren lanak doan erabiltzen uzteko, “irabazi asmorik gabeko” proiektua delako.
K6 Gestión Cultural enpresak antolatu du Donostia 2016ko “Bakearen milia” erakusketa eta “bakearen inguruko hausnarketa” sustatzea du xede, kultur hiriburutzaren webgunean irakurtzen denez.
Noticias de Gipuzkoa egunkariak argitaratutakoaren arabera, 226.100 euroko aurrekontua du proiektuak eta fotokazetariek, sarean zabaldu duten idatzi baten bidez, galdetu dute ea nora bideratuko duten diru hori.
“Honelako eskaintzen aurrean engainatuta sentitzen gara, irainduta eta iruzurra egin baligute bezala, bai maila pertsonalean, bai kolektibo gisa; horrelako ekitaldi garrantzitsu bat –aurrekontuari erreparatuta behintzat– antolatu nahi izan dute protagonista izan behar zuten argazkiak ordaindu gabe”.
Sona handiko fotokazetariek sinatu dute salaketa: Alvaro Ybarra Zavala, Andres Martinez Casares, Maysun, Guillem Valle, José Colón, Alfonso Moral, Andoni Lubaki, Pep Bonet, Gervasio Sánchez, Raúl Gallego Abellan, Luis de Vega, Rafael Fabres, Manu Brabo, Ricardo García Villanova, Sergio Caro eta Diego Ibarra Sánchez.
“Gaizkiulertua” izan dela argudiatu du Donostia 2016k
Polemika zabaltzen hasi ostean, Donostia 2016ko iturriek azaldu dute K6 enpresaren eta argazkilarien artean “gaizkiulertua” gertatu dela.
Gipuzkoako hainbat museo (Irungo Oiasso, Ormaiztegiko Zumalakarregi, Añorgako Rezola museoa…) kudeatzen dituen K6k, bere aldetik, azaldu du “Bakearen milia” ez dela argazki erakusketa bakarrik, beste hainbat ekintza ere biltzen dituen egitasmoa baizik.
Kexa publiko egin duten bi argazkilariren lanak erakusketan erabiliko dituztela baieztatu daiteke: Andoni Lubakiren eta Manu Braboren lanak agentzien bidez eskuratu dituzte antolatzaileek azkenik.
Gaizkiulertua bateri baino gehiago bidali diguten emailean “no contamos con presupuesto, porque como imaginareis, la exposición no tiene ningún fin lucrativo” jartzea? Nola gaizki ulertu daiteke hori? Beste esplikaziorik ba al du esaldi horrek? Tontotzat gaituzte?
Eta bai, nire argazkiak jarriko dituzte, prentsa agentzietatik hartua erakusketa baterako, nire gogoz aurka izango da baina. NIK, PUBLIKOKI DIOT, EZ DUDALA NIRE ARGAZKIRIK AGERTZEA NAHI BAKEAREN MILIAN, EZ DUDALA NIRE IZENA AGERTZERIK NAHI BERTAN.