Trinitateko auzo baratzea errespetatzeko eskatu diote Jazzaldia iragartzen duen garagardo markari

Atalak: Herri kultura, Hiri eredua

Gazteak lanean Trinitate plazako auzo baratzean (argazkia: @ArranoBeltzaEus).

Uztailaren 20an hasiko da Donostiako Jazzaldia eta Donostiako Alde Zaharreko Gazte Asanbladak kezka adierazi du: urtero jazz jaialdiaren babesle nagusia den garagardo marka iragartzeko kartel handi bat jartzen du Trinitate plazan, hain justu gazteek joan den apiriletik auzo baratzea martxan jarri zuten lekuan.

“Aurreko urtean ere jarri zuten, eta ‘Euskal Herrian euskaraz’ jartzen zuen baimendutako murala kendu zuten iragarki hori jartzeko”, azaldu du Gazte Asanbladak bere blogean. “Ez gara beldur baratzea kentzeko arriskua dagoelako baina idatzi honen bitartez auzotar guztietara heldu nahi dugu eta udalari gure ideia zein den argi eta garbi utzi nahi diogu honekin. Baratzeak bertan jarraitzea nahi dugu, eta ez dugu onartuko iragarki batengatik auzo proiektu hau zapuztea. Ez dugu esaten kartel hori ez jartzeko, baina baratzea errespeta dezatela. Izan ere, baratzea ez da inorena eta aldi berean denona da, baratzean denok dauzkagu eskubide berdinak eta edonork har dezake parte. Baratzea ez da gazte asanbladarena, denontzat dago tokia eta ez dugu uste inori kalte egiten ari garenik. Beraz, errespetatu ezazue denona den txokoa, denok zarete ongi etorriak bertara”.

Apiriletik martxan

Jazzaldia dela-eta argitaratu duten testuan auzo baratzearen ibilbidea ere errepasatu dute. Trinitate plazako goialdean dagoen lur zatia guztiz utzita zegoela esplikatu dute, baratzea egiten hasi zirenean aurkitu zuten panorama deskribatzearekin batera (“100 xiringa inguru, beira zatiak…”).

Letxugek eta tomateek lekua irabazi diote zikinkeriari, baina bidea ez da erraza izan apiriletik hona. Gazte Asanbladak azaldu duenez, baratzea martxan jarri eta bost egunera FCCko langileek, udaltzainen babesarekin, suntsitu egin zuten ortua. “Ordutik aurrera gauzak okertu ziren, identifikatuak egon ziren baina oztopo guztien gainetik, auzo baratzearen proiektua ez zen hor gelditu”. Horri esker, baratzeak emandako uztarekin lehen bazkaria egin dute jadanik.

Udalak proiektuari jaramonik ez diola egin kritikatu dute: “Ez dugu erantzunik jaso; duela bi hilabete eskatu genien bilera bat egiteko udaletxeko ordezkariekin baina ezer ez”.