“Non da parte-hartzea? Inposaketa da!” aldarrikatu dute eragile ugarik

Atalak: Azpiegiturak, DSS2016EU, Herritarren aldarrikapenak, Hiri eredua

Donostiako udaletxearen aurrean protesta egin dute kolektibo eta eragile ugarik deituta, Demokrazia Zuzenaren Foro Globalaren irekiera ekitaldia baliatuz. “Donostia ez da eredugarria demokrazian, Donostiako Udalak jardunaldi hauen aurkezpenean dioen bezala”. Parte hartzeko mekanismoak eskatu dituzte ondorengo kolektiboek: Satorralaia metro pasantearen aurkako mugimendua, Eleak/Libre, Errausketaren Aurkako Mugimenduak, Etxe Kaleratzeak Stop!, SOS Miracruz 19, Belartza 2 gelditu, Uliako Lore Baratzak, LAB eta. EH Bildu eta Podemoseko ordezkariak ere izan dira elkarretaratzean. Bakoitza bere pankarta, kartel edo aldarrikapenekin udaletxearen aurrean kokatu dira.

Harrera ekitaldira joan diren jardunaldietako parte hartzaile ugari interesatu dira herritarron aldarrikapenekin.

Jardunaldiak Miramar jauregian egingo dituzte azaroaren 17tik 19ra. Parte hartzeko izen emateak 100 emateak balio ditu.

“Indarkeria terrorista bukatu ondoren hirian arnasten den aldaketagiro berrian, herritarrak eta Donostiako Udala eskuz esku aritu dira erabakiak hartzeko fase eta esparruetan herritarren partaidetza sendotzeko asmoz. Kostalde atlantikoko hiri eder hau demokraziaren eta hiribizitza komunitarioaren eredu bihurtzen ari gara”, irakur daiteke jardunaldien harrera testuan.

Protesta deitu duten mugimenduek adierazi dutenez, “ozenki adierazi nahi dugu ez gaudela prest Donostian herritarren parte-hartzea eredugarria dela onartzeko, ezta gure hiria “Demokraziaren Munduko Hiriburua” dela onartzeko ere, Udal Gobernuak jardunaldi hauen aurkezpenean lotsagabeki dion moduan”.

Zenbait argazki segidan.

Donostiako Udalari Mundu mailako forumetatik harago, parte hartzea eskatzen ari dira kolektibo ugari. #globfor16 pic.twitter.com/lIIT05Zyr5

— Lander Arbelaitz (@larbelaitz) 2016(e)ko azaroak 16