Donostia 2016ren inaugurazioa: gastua ez dago argi
Martxoan sartuta, hiriburutzaren inaugurazio arrakastarik gabeak zeresana ematen jarraitzen du. Oraingoan, urtarrilaren 20tik 24ra bitarteko ospakizunen gastuak eman du hizketarako gaia: Gipuzkoako Ahal Duguk Foru Aldundiari kostuen azalpen zehatza eskatu dio eta erantzunak bi kopuru berri eman ditu. Zenbat eta gehiago galdetu, inaugurazioa garestiago atera dela dirudi.
Errepasa ditzagun urtarrilaren 20tik hona argitaratu diren diru kopuruak.
660.000 euro
Hansel Cerezak zuzendutako ikuskizuna Donostia erdiaren kritiken jo-puntuan egoten hasi zenean inaugurazioaren kostuei buruzko lehenbiziko datua argitaratu zen. 660.000 euro kosta zela irakurri genuen orduan Diario Vascon publikatutako albiste labur batean. Ordu erdiko ikuskizuna zela kontuan izanda, 22.000 euro minutuko.
1.456.521 euro
Baina Ahal Duguren galderari erantzunez Gipuzkoako Foru Aldundiak emandako azalpenetan zera irakurtzen dugu: “urtarrilaren 20tik 24ra bitartean egindako inaugurazio ekitaldiek 1.456.521 euroko kostua izan dute”. Noski, ez dira Cerezaren ikuskizunaz bakarrik ari, inaugurazio ekitaldi guztiez baizik. Baina…
2.825.046 euro
… Aldundiak ondoren gastuen xehetasunak ematen ditu eta guztien batura egin ondoren, Ahal Duguk dio 2.825.046 eurokoa dela emaitza –sarean publiko egin duten dokumentuko zenbakiak batuta laugarren zenbaki bat ateratzen da, 2.807.239 euro–.
Bestalde, xehetasunei erreparatuz, Cerezaren ikuskizunaren benetako kostua hasieran esandakoa baino garestiago atera dela ondorioztatzen da: 800.053 euro, “inaugurazio ekitaldia diseinatu eta sortzea” eta “inaugurazio ekitaldiaren ekoizpena” kontzeptuak batuz gero.
Ahal Dugu: “Informazioa ez da nahikoa”
Jasotako dokumentuan ematen den informazioa ez du nahikotzat Ahal Duguk. “Ez dakigu zein irizpideren arabera ematen den ekitaldi batzuei buruzko informazioa eta beste batzuei buruzkoa ez; ezta zergatik kasu askotan ez dakigun gastu jakin batek zeri egiten dion erreferentzia”.
Alderdi moreak onartezintzat jo ditu inaugurazioko gastuei buruz emandako azalpenak eta zuzentzeko eskatu die erakunde arduradunei, “gizarteak eskubide osoa baitauka diru publikoa zertara bideratzen den jakiteko”.
Iruzkinik ez
Trackbacks/Pingbacks