EusKarriak: euskararen normalizazioa bultza eta hizkuntza aniztasuna islatzeko proiektua

Atalak: DSS2016EU, Egitasmo ofizialetik nabarmenduak

Tabakalera kanpoaldean eskegi dute Europako Hizkuntzen Mapa, bost metro zabal eta lau metro altu ditu.

Donostia 2016 Fundazioak eta Bagera Donostiako Euskaltzaleen Elkarteak EusKarriak proiektua aurkeztu dute ostegunean Hirikilabs Hiri Laborategiaren egoitzan, Tabakaleran. Hizkuntzen inguruko sentsibilizazioa eta hausnarketa bultzatu nahi ditu egitasmo honek. Kalean kokatuta egongo direnez, herritarrek proiektuokin topo egitea da asmoa. Hizkuntzen egungo errealitatea hiru ardatz ezberdinetatik jorratuko dute: Europa mailan dagoen hizkuntza aniztasunetik; Donostian bertan aurki daitezkeen dozenaka hizkuntzen begiradatik eta euskararen normalizaziorako egindako lanetik.

Bertan izan dira Xabier Paya, Donostia 2016ren kultur programaren zuzendaria; Aroa Huarte, EusKarriak proiektuaren arduraduna Bagera Elkartean eta Iñaki Rifaterra, Europako Hizkuntzen Maparen egileetako bat.

Prozesu parte-hartzailea

Donostiako kaleetan barrena ezarriko diren euskarrien sorreran, 2015eko ekainetik urrira arte egindako parte-hartze prozesua dago. Alor ezberdineko 30 bat pertsona (hizkuntzen esparruko aditu/arituak, Donostiako herritarrak eta sortzaileak) elkartu ziren, zabaldu beharreko mezuak, euskarri originalak eta hauen kokapenak proposatu eta adosteko.

Euskarriak

Hizkuntzen sentsibilizaziorako sortutako lehenbiziko euskarria gaur Tabakalera kanpoaldean (Nestor Basterretxea plazan, zehazki) eskegi den Europako Hizkuntzen Mapa da. Bost metro zabal eta lau metro altu dituen egurrezko mapa honek, Europan dauden 91 jatorrizko hizkuntza irudikatzen ditu.  Egiatik, hiri erdialderantz pasabidea hartzera doazen herritarrek begien bistan izango dute gaurdanik Europako Hizkuntzen aniztasuna.

Ez dago Europako Hizkuntzen Maparen eredu bakarra; hizkuntzak bata bestearengandik bereizteak eta hauen hedadura geografikoa zehazteak dituen zailtasunagatik. Mapa honetan irudikatzen dena, CIEMENek landutakoa eta Munduko Hizkuntza Ondarearen UNESCO Katedrak (EHU) eguneratu eta Euskal Herrira ekarritakoa da.

Duela zenbait aste hasi ziren bigarren euskarria lantzen, hiztegi-makina delakoa. Euskaratik beste 50 hizkuntzetarako norabidean eta alderantziz, Topaguneak sortuta dituen hiztegiak oinarri hartuta, hiztegiak inprimatuko dituen hiztegi-makina sortzen ari dira hamar bat lagun Hirikilabsen, urtarrilean egindako deialdiari erantzunez. Hirikilabs-en oinarriekin bat eginda, euskara eta teknologia lotzen ditu prozesu berritzaile honek. Hiztegiaren hizkuntzak aukeratu eta unean bertan inprimatuko duen makina sortzeko beharrezko guztia diseinatu, programatu eta eraikiko dute. Udaberrian Donostiako leku ezagun eta jendetsu batean instalatuko da makina, bertatik igarotzen direnek hiztegiak eskuratu ahal izateko.

Gainontzeko EusKarriak Donostiako auzoetan barrena “azalduko” dira herritarrak ustekabean hartuko dituela, antolatzaileek jakinarazi dutenez.