Madrildarrok, erosi hemen zuen hiper luxuzko etxea

Atalak: DSS2016EU, Hiri eredua

Engel & Völkers inmobiliariak luxuzko etxeak saltzeko Donostia 2016 argudio gisa erabiltzen du

Erredakziora iritsitako prentsa oharrak honela dio: “Donostiako Engel & Völkers Inmobiliariak ekitaldi berezia antolatu du Madrilen, Donostiako, Hondarribiko eta Gipuzkoako berezitasunak eta potentzialitateak erakusteko eta Madrilgo Autonomi Erkidegoko erosleen eta inbertsoreen aurrean bere luxuzko etxebizitzak aurkezteko”.

Ostegun honetan Madrilgo Club Financiero Génova elkartean –PPren egoitza nagusitik 300 metrora– jarri dute hitzordua. 250 gonbidatu, etxe-saltzaileen bezeroen arteko selectoenak oharrean zehazten denez. Gero literatura pixka bat dator: Donostiaren eta Madrilen arteko ahizpatasuna goraipatzen da XIX. mendeaz geroztik Espainiako hiriburutik etorritako bainulariak gogoratuz –Francisco Franco Bahamonde izeneko gizontxoaz ez dira akordatu, pena–; eta nola ez, Donostia 2016 Europako Kultur Hiriburuaren garrantzia nabarmentzen zaigu.

Baina goazen inporta duten gauzez hitz egitera: Espainiako Estatuarekin alderatuta Donostian eta Gipuzkoan etxe gehiago saltzen direla kontatzen du Engel & Völkers inmobiliariak eta prezioak EAEn gutxiago jaisten direla Errioxatik behera dagoen panoramarekin konparatuz. Nire buruari esaten diot: “Hori ez al da problema abantaila baino gehiago?”.

Ba testua idatzi duenarentzat ezetz dirudi, are gehiago, azken hilabeteetan EAEn etxebizitzak garestitu egin direla txalotzen du –“garestitu” esan ordez “revalorizar” aditza erabiliz; alkimia berbal bera erabiltzen dute hondakinak erraustearen aldekoek ere zaborren “balorizazioa” aipatzen dutelarik, portzierto–.

Eta zenbaki-saltsa baten ondoren dirua daukan jendeari helarazi nahi zaion mezura iristen gara: “Zalantzarik gabe, burtsako kotizazioen beherakada eta balio-merkatuen ziurgabetasun handia higiezinen merkatua suspertzen ari dira”. Esan dezagun argiago: burtsan zure sosak ikastolako atariko karamelua bezain erraz desager daitezke, beraz ez izan tontoa eta erosi ezazu etxe puska bat Donostian, ikusiko duzu nola hamar urte barru garestiago sal dezakezun.

Hain modu sinple eta friboloan eskubide bat, etxebizitza, salgai nola jartzen den ikusita idatziaren hurrengo paragrafoak saltoka irakurri ditut, “San Sebastián está pulverizando, progresivamente, todos los registros en materia turística”, “destino de moda”, “prestigio internacional en rankings como destino gastronómico”, “bajo el telón de fondo, además, de la celebración de SS2016EU”.

Nire hesteak ez dira oharraren bukaerara iristeko kapaz izan.