Metroa geldiarazteko kontzentrazioa egin dute Kursaalen
Kursaalean egindako elkarretaratzea.
Metroa gelditzearen alde lanean ari den Donostiako Sator Alaia bizilagunen mugimenduak deituta, kontzentrazioa egin dute 80 lagunek ostiralean 12:30etik 13:00ra Kursaal jauregian egiten ari den Hiri Handien Sare Iberoamerikarraren (CIDEU) Kongresuaren aurrean. Deitzaileen esanetan, Donostian Metroa eraikitzeko egitasmoak “gure hirian egin nahi den astakeria eta zentzugabekeria” da eta horren aurkako salaketa eraman nahi izan dute bilkura horretara.
Prentsari igorritako oharrean diotenez, “lotsagarria” iruditzen zaie hiritarren parte-hartzeari buruz hitz egitea, “proiektu horren gainean erakundeek ez dutenean informaziorik eman ezta eztabaidarik sustatu ere”. Erakundeen gardentasun-eza, parte-hartze publikoa “larriki mugatzen duen tramitazio hertsia” eta bizilagunen argudio eta proposamenekiko “erdeinua” salatu dituzte.
“Metroaren justifikazio edo zuribide ofiziala, azpegitura horren eskariari buruzko zifra faltsuen gainean eta egiazko informazioa baino propaganda kutsu nabaria duten adierazpen triunfalisten gainean eraikia izan da” Sator Alaiako kideen ustez. “Aintzat hartu gabe utzi nahi dira bai Metroaren eraikuntzak udalearrian eragingo lituzkeen kalte larriak –besteak beste hirigintza alorrean eta DBus-en zerbitzuetan–, bai gastu sozialen kaltetan dakarren baliabide publikoen xahuketa, baita egungo garraio publikoko sare osoa hobetze aldera Topoaren eta hiriko autobus linea nagusien arteko osagarritasuna lantzeko proposatu diren alternatiba eraginkorragoak eta kostu ekonomiko arras txikiagokoak ere”.
Iruzkinik ez
Trackbacks/Pingbacks