2014ko (orain arteko) 10 telesail onenak

Atalak: Gomendioak, Telesailak

9 hilabete pasa dira jada urtea hasi zenetik eta telesailen arloan balorazio txiki bat egitea tokatzen da. Estreinu ugari egon dira eta ia guztiak ikusten saiatu naiz ( begiratu hutsarekin eta nire telesailzaletasun friki senari esker, batzuk lehen atala ikuste hutsarekin  baztertu ditut). Pertsonaiengatik nabarmendu dira batzuk, besteak giropen edo atmosferagatik, besteak gidoi borobil batengatik eta musikarengatik, baina gutxi batzuk elementu guzti horiekin sinfonia perfektu bat osatzeagatik. Batzuk amaitu dira, beraz bidezko balorazio bat egin ahal izan dut, baina besteak atal batzuk soilik igorri dituzte edo denboraldi gehiago dauzkate datorren urterako prest. Dena dela, hemen doaz nire ustez, 2014 urteko lehen etapa honek eman dituen 10 telesail onenak:(INFO7 irratian ere hitz egin nuen honi buruz, hemen audioa entzungai nahi duenarentzat)


 

10- PREY

( 2014, Nick Murphy) 

Marcus Farrow da istorio honen protagonista.  Burutu ez duen krimen bat leporatu zaion Manchesterreko polizia bat eta justiziarengandik ihesean dabilena. 3 ataleko telesail-motza. Ez da ingeles drama polizial tipiko horietako bat egikera motel eta zaindua duena, baizkik eta akzioz eta erritmoz jositako ekoizpena baizik.

9- THE KNICK

( 2014, Steven Soderbergh )

4 atal besterik ez dituzte igorri, baina nahikoa telesail bitxi, ezberdin eta basati honi buruzko balorazio bat egiteko. Steven Soderbergh zuzendari ospetsuak ekoiztua, XXgarren mende hasieran New Yorkeko ospitale bateko langileen bizitza profesionala eta pertsonala azalarazten duen telesaila dugu eskuartean. Medikuntzaren alde ilunera murgiltzen gaituen lan ausarta eta ezohikoa. Clive Owen aktore ezaguna, bikain  John W. Thackery mediku  drogazale, matxista eta arrazistaren paperean.
 
 

8 – INSIDE No 9

( 2014, Reece Shearsmith , Steve Pemberton )

6 atalez osaturiko antologia bat, humore beltz, thriller, beldur klaustrofobiko eta gidoi aldetik biraketa harrigarriekin. Oso serie originala eta ikusteko erraza. Atal bakoitza independientea bestearekiko eta bi protagonista nagusiak paper ezerberdinen artean mugitzen direlarik. Nabarmentzekoa inongo momentuan espero ez dituzun gidoi biraketak, eta genero aldaketarekin nola egiten duen jolas. Izugarria batez ere bigarren atala “A quiet night in” Buster keaton eta Chaplinen filmei omenaldi bat.
 
 

7 – COSMOS

( 2014, Ann Druyan , Steven Soter )

Carl Saganen “Cosmos” telesail originala baino 30 urte beranduago COSMOS: A SPACE-TIME ODYSSEY datorkigu. Zientziaren bitartez unibertsoaren eta gizakiaren mugen bila arituko da.Neil deGrasse Tyson astrofisiko ospetsuak aurkeztua. Zientziari buruzko dokumenta-telesail bat ikusteko modu oso entretenigarria eta didaktikoa.
 
 

6 – THE HONOURABLE WOMAN

(2014  , Hugo Blick )

Hugo Blick , 2011 urtean “The shadow line” telesail bikaina zuzendu zuen, aurten berriz  “The honorauble Woman” ekoizpenarekin datorkigu. Nessa Stein da protagonista, arma enpresa bateko arduradun ospetsua. Ekialde hurbileko bake prozesuen barneko makinariaren parte dena. Intriga eta tentsioa nahasten dituen thriller labirintiko aparta. Tekniko bikaina. Pertsonaia sakonez beterikoa eta interpretazio bikainez osturikoa. Gidoi konplexua eta oso landua era berean. Pixkanaka harrapatuko zaituena, baina konturatu orduko askatuko ez zaituena.
 
 

5 – GOMORRA

( 2014, Stefano Sollima, Claudio Cupellini)

Roberto Savianoren liburua eta 2008ko filmaren ostean, oraingoan Napoliar kamorraren bizitza azalarazten duen telesaila datorkigu. Ez da telesail polita, alaia ere ez eta erromantikoa are gutxiago. Akzioa, suspensea, tiroak, traizioa, beldurra…guzti horretatik ordea ez da ezer falta. Lehen ataletik harrapatzen zaituen telesaila. Gidoi bikaina, biraketa ugarirekin.
 
 

4 – THE LEFTOVERS

( 2014, Damon Lindelof, Tom Perrotta )

The leftoversen  inguruan,  Damon Lindelof, LOST telesailaren sortzaileetako batek esan zuen: “telesail honek erantzunak baino, galderak sortaraziko ditu zure garunean”. Esaldi hori abiapuntutzat hartuz hasi behar gara telesail bitxi hau ikusten. Bapatean, munduko biztanleriaren %2a desagertu egiten da. Inork ez daki non dauden eta zer gertatu den. Ikuslea bi mutur ezberdinetan banatzeko gaitasuna duen telesail horietakoa: bikaina irudituko zaizu edo txorakeria bat, ni lehengoen multzo barruan nago. Atmosfera bikaina,misterio eta suspensez beterikoa. Arraroa, erakargarria eta ezberdina. Esaldi batekin definituko nuke telesailaren mezua: Berdin dio desagerturiko pertsonak non dauden, garrantzitsuena bertan gelditu direnak dira, eta nola birmoldatuko dute bizitza maite dituzten pertsonak ondoan ez eduki arren.
 
 

3 – FARGO

( 2014, Noah Hawley )

Coen anaien Fargo pelikulan oinarrituriko telesaila. Urteko beste estreinuetako bat. Humore beltzez josia eta Coen anaien filmeei erreferentziaz betea. Gidoi bikaina. Aktore guztiak zoragarri batez ere Billy Bob Thornton. Ezinbestekoa.
 
 

2 – HAPPY VALLEY

(2014, Euros Lyn, Tim Fywell, Sally Wainwright)

Bahiketa baten inguruko drama bortitza. Telesai ingeles askok bezala gidoi borobilekoa eta 6 ataletan soilik  istorio bortitz bat kontatzeko ahalmena duena.  Aktore guztiak bikain  batez ere Sarah Lancashire. Petsonaia konplexu eta sakonez osaturiko drama milimetrikoa.
 
 
 

 1 – TRUE DETECTIVE

( 2014, Nic Pizzolatto)

Rust Cohle eta  Martin Hart dira istorio honen protagonistak. Hiltzaile bat, desagertze misteriotsuak…URTEKO SERIEA dudari gabe. Izugarria, iluna, gogorra, paregabea, antologia dramatiko bat. Pertsonaien ikerketa metodiko eta milimetrikoa eskaintzen digun maisu lan bat. Matthew McConaughey IZUGARRI.   Gidoia, argazkia, musika…guztia dago era perfektuan bata besteari itsatsia sinfonia perfektu baten moduan. Aho zabalik uzteko modukoa.