"Bedrag": urteko lehen harribitxi nordikoa

Atalak: Gomendioak, Telesailak

Borgen, Bron/Broen, Forbrydelsen, Jordskott, Äkta människor, Kampen om tungtvannet, 1864…azken bost urteetan, telesail bikain  guzti horiek leku beretik jaio izanak,  Europa Iparraldean zerbait oso ongi egiten ari direnaren sintoma garbia dira. Baina bolada hori ez da hor eten, ezta gutxiago ere. Pantaila txikiaren arloan, Ingalaterra eta AEB-kin parez pare lehiatzeko argudio sendoekin hasi baidute urtea. Zerrenda horri, beste ezinbesteko ekoizpen bat gehitu behar baitiogu; Danimarkatik datorren Bedrag telesaila.

Denetik ikusi dugu hotzetik datozen ekoizpen hauetan; Naturarekin erlazionaturiko suspensezko istorioak, Nordic noir deituriko thriller ilunak ala bertako politika hankaz gora jartzeko gai diren ekoizpenak: gehienek, bi euskarri nagusitan oinarritzen dituztelarik euren tramak. Alde batetik, gizarte kritika ziztatzailea; eta bestetik, pertsonaia sakonez osaturiko gidoiak. Bedrag, ez da atzean geratu, kontzeptu guzti horien erakustaldi bilakatu delako. Kasu honetan, trama nagusi horren erdigunean, Energreen kokatzen da, energia berriztagarriak ardatz dituen enpresa.

Pertsonaiak eta argumentua

Mads (Thomas Bo Larsen) izeneko Danimarkar polizia batek, gorpu bat aurkitzen du kostan. Antza denez,  Danimarkako enpresa eoliko handienaretzan (Energreen) turbina batzuekin lanean ari zela  gertatu omen da istripua. Baina laister ohartuko dira, gaia dirudiena baino askoz ilunagoa eta nahasiagoa aurkeztuko dela.

Paraleloan, aipaturiko Evergreen konpainiaren barrenak ezagutuko ditugu.  Bertako zuzendaria, Alexander Södergreen (Nikolaj Lie Kaas aktore bikaina) gizon arrakastatsua izan arren, guztia ez doa berak nahi bezala eta ia edozer egiteko prest egongo da. Bitartean, Claudia (Natalie Madueño), –mailaz igotzeko irrikaz dagoen abokatu gazteak-, enpresaren normaltasun hori, hankaz gora jarri dezakeen barne arazo batzuk detektatuko ditu.

Eta azkenik, lehen begiradan konexio gehiegirik ez duen hirugarren istorio bat azalduko da. Nicky (Esben Smed). Kotxeak lapurtzeagatik, aurrekari penalak dituen mekaniko gaztearen bizitza xumea. “Breaking bad” telesaileko “Jesse Pinkman”-ekin antzekotasunak dituen pertsonaia. Bere galmena drogak izan beharrean, delitu txikiak direlarik.

Hauxe da, Borgen bikainaren gidoilarietako batek (Jeppe Gjervig Gram) sortu duen telesailaren hasierako planteamentua. Hortik aurrera, eta xake partida batean bezala, pieza guztiak taulan txukun-txukun ipinita dauden bitartean; gezurra, azpijokoak, hilketak, lapurretak eta iruzurrak sartuko dira jokoan. Baina batez ere, trama korapilatsu horren barruan, pertsonaia guztien motorra bultzatuko duen gasolina arriskutsu hori azalduko da: kodizia. Energia berriztagarria iturri naturaletatik sortzen den energia mota den bezala, pertsonaiek mugitzeko behar duten erregaia aldiz, diru-gosea izango da. Hasierako titulu zoragarri horietan ikus dezakegun bezala, hainbat momentutan itolarria sentitu arte.

Atalak pasa hala, erabat harrapatuko zaitu telesailak. Traman murgiltzen goazen heinean, armiarma sare batean itsatsirik egongo bagina bezala sentituko dugu. Gidoiaren pieza guztiak pixkanaka ahokatzen joango direlarik. Hasiera batean konexiorik ala garrantzia gehiegirik ez duen istorio txiki horrek ere, pisua hartuko du amaieran. Protagonista guztiak mugan jartzeak, amildegitik erortzeko zorian, eztanda txki bat eragingo duelarik. Baina ez pentsa gaiztakeria ala azpijoko horiek, garrantzi txikiko kriminal arruntek burutzen dituztenik –Nicky-ren kasua salbu-, istorio honetan, bihozgabe eta arriskutsuenak – errealitatean bezala seguruenik- gorbataz jantzitako kriminalak direlako.

Eko-telesaila?

Jordskott eta Okkupert telesailekin batera, ekoizpen nordikoetan loratzen ari den fenomeno ala etiketatxo baten kide bilakatu dira: Eko-telesailak deiturikoak. Jorratzen dituzten gaietan, osagai erreflesibo-ekologiko bat azaleratzen delako.

Zuzenean, urteko onenaren zerrendara…

Oraindik Martxoan egon arren , zuzenean, urteko TOP horren barruan sartuko dudan telesaila. Hurrengo asteetan aipatuko dudan, Trapped telesail Islandarrarekin batera, 2016ko Europa iparraldeko ezinbesteko harribitxi baten aurrean gaudelako. Gidoi sendoa, azpigeruzaz beteriko trama erakargarria, aktore bikainek gorpuzturiko pertsonaia sakonak eta batez ere, ikuslea, pertsona inteligentetzat hartzen duen ekoizpen baten aurrean gaudelako. Ez galdu.

 

Herrialdea: Danimarka
Sortzaileak: Anders Frithiof August, Jeppe Gjervig Gram, Jannik Tai Mosholt
Aktoreak:  Martin Hylander Brucker, Lucas Hansen, Thomas Hwan, Esben Smed Jensen, Line Kruse, Thomas Bo Larsen, Nikolaj Lie Kaas, Natalie Madueño, Henrik Noël Olesen, Waage Sandø, Lars Simonsen, Stine Stengade
Denboraldiak: 1 (badirudi bigarren bat egongo dela)
Atal kopurua: 10