Udako 6 telesail onenak

Atalak: Gomendioak, Telesailak

Pantaila txikiaren arloan, udara beti izan da estreinaldi eskaseko garaia. Baina honetan ere,  panorama dezente aldatzen ari da azken urteotan.  Ez dut esango maila goreneko telesail mordoa estreinatzen denik, baina bai urteko top horren barruan sartuko diren izenak azaldu direla. Hementxe udara honetan (momentuz) estreinatu diren telesail onenak –denboraldi berri onenak barne–:

Berrien artean…

1- Stranger things

Sortzaileak: Duffer anaiak
Aktoreak: Winona Ryder, David Harbour, Finn Wolfhard, Millie Bobby Brown, Gaten Matarazzo, Caleb McLaughlin, Natalia Dyer, Charlie Heaton, Matthew Modine, Noah Schnapp, Cara Buono, Joe Keery, Rob Morgan, John Reynolds, Joe Chrest, Ross Partridge
Atal kopurua: 8 (bigarren denboraldia konfirmatua)
“Goonies never say” die oihukatzen duzun bitartean,  Willy begibakarraren altxorraren bila abiatu. E.T bezalako maskota bat alboan duzula, bizikleta baten gainean zerua zeharkatzen duzula imajinatu. Ala Stand by me filmeko protagonista bazina bezala, hildako baten inguruko misterioa argitzen saiatu. 25-40 urte bitarte badituzu, ziur askotan amestu duzula mundu zoragarri horien barruan zinela. 80. hamarkadan, Reiner, Spielberg, Zemeckis ala Donner bezalako zuzendariek, magiaz beteriko zinema oparitu ziguten. Umorea eta beldurra uztartuz, familia arteko istorioak, lagunartekoak eta batez ere, adin-nagusitasunera jauzia islatzen zituzten filmak ikusteko aukera eskainiz. Abentura guzti horiek, belaunaldi oso baten bihotz eta garunean betiko itsatsiak geratzea lortu arte. Matt eta Ross anaiak garai hartako semeak izanik, berreskuratu beharreko esentzia hori pantaila txikira ekartzeko beharra zegoela erabaki zuten.   2016 urtean,  Netflix plataforma digitalaren eskutik,   “Stranger things” telesailari esker, une horien esentziaz gozatzeko aukera oparituz.
Zalantzarik ez dago, Udako telesailean bihurtu dela.  Aspalditik iragarria zegoen, baina sorpresa moduan hartua izan da mundu osoan. Sare sozialak sutan jartzea lortu eta urteko fenomenoetako bat bilakatu da. 80. hamarkadaren erreferentzia entsalada hau ikusteko, 8 orduko maratoiak eta hainbat ekitaldi antolatu dituztelarik. Eta zein izan da Duffer anaiek zanpatzea lortu duten tekla magiko hori?  Telesailaren posterra ikuste hutsarekin (Drew Struzan marrazkilariari omenaldi nabarmena), gure Delorean partikularrean hamarkada zoragarri horretara bidaia egiteko aukera eskaini digutela. Sentsazioen berpizketa etengabea, eszenaratze perfektu batekin, karakterizazio eta interpretazio bikain batzuei esker -Wynona rider salbu, guztiz esajeratua eta neurriz kanpo dagoela uste dut-  eta ezin hobeto tartekaturiko beldur dosi txikiak erabiliaz.  Umorea, zientzia fikzioa, suspensea, maitasuna  eta akzioa modu hain orekatuan uztartzea ez baita batere erraza.
 

2- The Night Of

Sortzaileak: Steven Zaillian, Peter Moffat
Aktoreak:  John Turturro, Jeff Wincott, David Chen, Xavier Cadeau, Poorna Jagannathan, Sofia Black-D’Elia, Reginald L. Barnes, Racquel Bailey, Shaun Rey, Frisco Cosme, Christofer Jirau, Damany Mathis, Samuel Standard, Frank Ridley
Atal kopurua: 8
Izen bereko telesail Britainiar baten remake-a, kasu honetan HBO-k ekoiztua. 3 atal besterik ez dituzte aireratu, baina nahikoak, telesail bikain baten aurrean gaudelako jakiteko.  Neska ezezagun batekin oheratu ostean, hurrengo goizean esnatzean, neska hilda eta labankadaz josia dagoela ohartzen da. Protagonistak ez du ezer gogoratzen eta ihes egitea erabakitzen du. Hortik aurrera xehetasunez jositako ekoizpen milimetriko bat ikusteko aukera izango dugu. Esan bezala,  balorazio justu bat egiteko denboraldi erdia baina gehiago falta den arren, ziur nago urteko aipagarrienen artean sartuko dudala. Ez galdu.
 

 3- Sigeuneol (The signal)

Sortzailea: Won Suk Kim
Aktoreak:  Je-hoon Lee, Hye-su Kim, Jin-woong Jo
Atal kopurua: 16

Memories of murder pelikula bikainean oinarrituriko telesaila. Filma, 1986ko Hego Korean girotuta zegoen. Neska gazte bat bortxatu eta erahil egin dute. Bi hilabete geroago, “modus operandi” berarekin akabatutako biktima gehiago azalduko dira. Serieko hiltzaile horren kasua ikertu bitartean, elkarren artean oso desberdinak diren bi poliziaren istorioa ikusi ahal izango dugu.
Telesaila aldiz, modu bitxi baina erakargarrian hartu nahi izan du istorio horren zatitxo bat. Ukitu fantastikoak emanez eta umore dosi txikiak tartekatuz. Iraganeko detektibe bat eta orainaldiko bat, walkie baten bitartez kasua argitzen saiatuko baitira. Ez da filma bezain iluna eta basatia, baina bai hura bezain “itsaskorra” eta interesgarria.

 Bueltatu direnen artean…

4- Mr Robot II

Sortzailea: Sam Esmail
Aktoreak:  Rami Malek, Christian Slater, Carly Chaikin, Michel Gill, Gloria Reuben, Martin Wallström, Grace Gummer
Atal kopurua: 10 (momentu honetan 2. denboraldia aireratzen ari dira)

Bueltan da iazko telesail onena. Ikusi ez duenarentzat, istorioaren protagonista Elliot Alderson dugu;  jatorri egiptoarra duen Rami Malek aktoreak gorpuztua. Jendearekin harremantzeko arazo nabarmenak dituen tipo bitxia da Elliot. Ziber-segurtasunaren arloan egiten du lan, baina lan orduetatik at, duen jakintza gaizkileei ‘mozorroa kentzen’ aritzen da, Fsociety izeneko elkarte ilunaren baitan. Tartean, hainbat vendetta pertsonal ere burutuko ditu. Eta mendekuen zerrendan lehen postuak badu izena: E-Corp. Google eta Apple elkartuko balira ere barregarri geratuko liratekeen megakorporazio gaizto horretan lan egindakoa da Ellioten aita.
Alde batetik, gaurkotasun handia duten gaiak lantzen ditu atalkako thriller psikologiko honek; gidoi ziztatzaile bikaina du. Eta bestetik, telesailetan oso gutxitan ikusitako estetika eta erreferentziaz jositako lengoaia zinematografiko aberatsa du. Adibidez, planoen aukeraketak, horien tratamenduak eta musikarekin batera sortzen duten sinfoniak Stanley Kubrick dakarkidate gogora.
Bigarren denboraldia gogor hasi da oso, aurrekoarekin alderatuz planteamendu desberdin batekin; Elliot-en garunean murgiltzeko aukera izaten ari baikara lehen atal hauetan. Trama geroz eta ilunagoa eta erakargarriagoa bihurtzen ari den bitartean.
 

5- Peaky blinders III

Sortzailea: Steven Knight
Aktoreak:  Cillian Murphy, Sam Neill, Paul Anderson, Helen McCrory, Joe Cole, Sophie Rundle, Eric Campbell, Ned Dennehy,
Atal kopurua: 6 ( 3 denboraldi momentuz)
Denboraldiak pasa hala geroz eta indartsuagoa, biribilagoa eta interesgarriagoa bihurtzen ari den telesaila. Lehen mundu gerratearen ostean (1914–1918) zaldi apustu etxe baten ardurapean,  Birmingham hirian kokatzen den Gangster familia baten istorioa kontatzen duen ekoizpena.

 

6- Gomorra II

 
Sortzailea: Stefano Sollima
Aktoreak:  Marco D’Amore, Fortunato Cerlino, Salvatore Esposito, Fabio de Caro, Christian Giroso, Giovanni Buselli
Atal kopurua: 12 ( bi denboraldi momentuz)

Ikaragarria Gomorra-ren bigarren denboraldia. Roberto Savianoren liburua eta 2008ko filmaren ostean, 2014ean izen bereko telesaila estreinatu zen. Ez pentsa telesail polit, alai eta erromantiko bat ikusiko duzuenik;  Akzioa, suspensea, tiroak, traizioa, beldurra…guzti horretatik ordea ez da ezer faltako. Lehen ataletik harrapatzen zaituen telesaila. Gidoi bikaina, biraketa ugarirekin. Bigarrenak, lehen denboraldia gainditu du gainera.