Zergatik diote "Westworld" telesaila, "Game of thrones" berria izango dela?

Atalak: Gomendioak, Telesailak

Igandean estreinatu zen AEB-tan HBO-ren zigilua itsatsia daraman telesail berria:  Westworld. Aktore zerrenda aipatzearekin soilik ikusteko gogoa pizten duen horietakoa:  Anthony Hopkins, Evan Rachel Wood, Thandie Newton,  Sidse Babett Knudsen (Borgen telesaileko Bridget Nyborg ahaztezina) eta  Ed Harris besteak beste. Hasierako 65 minutuak ikusi ostean, batzuk,   Game Of Thrones berria izan daitekeela diote. Hori baieztatzeko goizegi iruditzen zaidan arren –G.O.T berria izatea zehazki zer den ez dakidalako batipat– aitortu beharra daukat, urteko telesail onena izateko nire kiniela partikularrean gogor sartu dela. Hasierako tituluak, kontakizuna pantailaratzeko aukeraturiko estetika ilun hori, pertsonaia/aktore sorta zoragarria ,  Ramin Djawadi-ren soinu banda eta trama oso erakargarri batek, zeharo harrapatu nautelako lehen minututik.

1973 urtean Michael Crichton-ek zuzendu zuen izen bereko filmaren remake moduko bat dela esan daiteke, zientzia fikzioa eta western generoa uztartzen dituena. Gertuko etorkizun batean, istorioa goi teknologia jolas parke batean kokatzen da. Abentura zirraragarriak bizitzeko helburuarekin, pertsona dirudunak joaten dira bertara. Parke hori, gizaki itxura duten robotez betea dago eta erromatar, cowboy eta erdi aro garaien simulazioa gisa diseinatua dago. Androide horiek, bisitarien fantasia guztia asetzeko diseinatuak izan diren arren, bere nortasunarekiko kontzientzia bereganatzen hasten direnean, guztia aldatuko da.

“Zer” kontatu nahi duten oso erakargarria izanik, “nola” ere, modu paregabean landua dago. Telesailak, hiru ikuspegi narratibo desberdinetatik bideratzen gaitu hasieratik. Robotena,  parke tematiko horren langileena eta bezeroena. Esan bezala Antzinako Erroma, mendebalde basatia eta erdia aroaren artean aukeratzeko eskubidea duten bezeroak  (naiz eta momentuz Western alderdia bakarrik ikusi dugun). Trama nagusiaren gainetik, dilema moral eta etikoak hegan dabiltzan bitartean. Esan beharrik ez dago, HBO izanik, alderdi tekniko guztia ere paregabea iruditu zaidala. Argazkia, muntaia, eszenaratze bikaina eta soinu banda –Game of thrones aipatzen hasita,  Ramin Djawadi dugu musikaren erantzulea-.

Momentuz beraz, atal bat soilik ikusita, ezin gehiagorik esan. Emaiozue aukera bat eta bakoitzak aukera dezala zein bide hartuko duen. Hasiera ezin hobea eta oso erakargarria duela uste dut. Presarik ez duen mundu ilun eta konplexu batean murgilduko gaituena. Piezak estrategikoki mugitu eta ahokatzen joango direla ziur nago, xake partida perfektua bailiran. Zalantzarik ez dut, pertsonaien erabaki eta ekintza guztiek, etorkizunean ondorio larriak izango dituztela eta guztia geroz eta ilunagoa bilakatzen joango dela. Dolores (Evan Rachel Wood) pertsonaiaren aitak dioen bezala : “Infernua hutsik dago eta deabru guztiak hemen daude”

Dena den, asko irakurtzen ari garen “Game of thrones” berria izatea,  zer da zehazki? Oihartzun mediatiko berdina izatea? Pertsonaiez beteriko trama sakona duela? Onena, etiketa pisutsu hori gainetik kendu eta bere bide propioa jarraitzea izango du, ziur nago, tinko eusten badio, HBO-ren ikur bilakatu den telesail berria izango delako.

WESTWORLD

Sortzailea: Jonathan Nolan

Denboraldiak:  1 (momentuz)

Atalak: 10

Aktoreak: Anthony Hopkins, Ed Harris, Evan Rachel Wood, James Marsden, Rodrigo Santoro, Ben Barnes, Ingrid Bolsø Berdal (AKA Ingrid Bolso Berdal), Clifton Collins Jr., Sidse Babett Knudsen, Thandie Newton, Shannon Woodward, Miranda Otto,Steven Ogg, Jeffrey Wright, Jimmi Simpson,