"Wayward Pines", Shyamalan-en telesaila, iristear

Atalak: Albisteak, Telesailak

Manoj Nelliyattu Shyamalan, Indiar jatorriko estatubatuar zinema zuzendari, gidoigile eta ekoizlea. Gorrotatua eta maitatua aldi berean. Hasierako filmekin nire zuzendari gogokoenetarikoa bilakatu zen tipoa; The Sixth sense, Unbreakable, The Village eta Lady in the water, zoragarriak iruditzen zaizkit, bikainak. Signs eta The Happening aldiz,  nabarmentzeko moduko hainbat alderdi dituztela uste dut. Baina 2008tik aurrera, bere ibilbide zinematografikoak erabateko gainbehera baten kronika geldiezina dirudi.


Baina aurten, gainbehera hori gelditzeko asmoz – nik behintzat itxaropen hori daukat- , telesail bat estreinatuko du Maiatzaren 14ean: ‘Wayward Pines’. Twin peaks telesailaren ukituak dituen ekoizpena, edo hori dirudi behintzat trailerra ikusi ostean. Aktoreen artean ,Matt Dillon, Carla Gugino, Juliette Lewis, Toby Jones, Melissa Leo ala Terrence Howard bezalako izen ezagunak aurki ditzakegu.


 
Eta zeri buruzkoa da? Wayward Pines izeneko herrixka batean, bi polizia desagertu dira. Gertaera hau ikertzera,  Ethan Burke (Matt Dillon) agente sekretua bidaliko dute. Baina laister ohartuko da Wayward Pines, sekretuz josiriko toki arraro bat dela eta bertatik alde egitea…ezinezkoa.
Jarraian trailerra:


 
Lortuko al du telesail honek, hasiera batean erakutsi zigun bezala, zuzendari handia dela frogatzea? ala behin betiko hondoratuko dute? Maiatzetik aurrera kontatuko dizuet…