Beldurrezko astea 2015: Proposamenak!

Atalak: Fantasiazko eta beldurrezko zinemaren astea 2015, Gomendioak, Pelikulak

Bihar hasi eta azaroaren 6an amaituko den Fantasiazko eta Beldurrezko Zinemaren XXVI. astea iritsi da. Urtero bezala, proposamen eta ekintza ugari. Erakusketak alde batetik , Iberia FX Eskarmentua eta artifizioa Espainiako zineman, Misterioaren Itsasargia: Transmedia Weekend  izeneko proiektua, eta Misterioaren Itsasargia: Voodoo-Bia bestetik. Eta noski, Axelcasas-en pelikularen lehen sekuentziaren filmaketa: “Paranormales” izenekoa.

Baina batez ere, Antzoki Zaharreko pantaila handian, parranda paregabe horretan parte hartuko duten filmak. Aurten badirudirdi, “beldur serioa” izango dela hizpide, umore gutxikoa alegia. Hori bai, argi izan, asteak berezkoa duen giro horri esker/erruz, seriotasun guztia pikutara joan dela. Hementxe aurtengo nire proposamenak:

Euskal Harriaren ABDak

Zeri buruzkoa da?

Zinegile profesionalak, oilar-pisuan borrokatzera ohituak dauden amateurrak eta lehen aldiz kamera bat hartu eta labur bat grabatzeko abenturan murgildu diren animatu inkontzienteak. 2014ko udan euskal alfabetoko 26 hizkietako bat egokitu zitzaion bakoitzari eta hizki horretatik abiatuta beldur, zientzia fikzio edo fantasiazko film labur bat egiteko eskatu zitzaien.

7 probintzietako zinegileak, bakoitza bere aldetik lanean, 26 film laburrez osatutako film bat osatzeko. Jarri zitzaizkien baldintza bakarrak: laburrak euskaraz grabatzea, euskal elementuetan oinarrituak egotea eta goitik behera, Euskal Herrian ekoiztuak izatea.

26 labur, film bat, Euskal Harriaren ABDak.

Zergatik ikusi?

Benetan? Argudio gehiago behar dituzue elkarlan interesgarri hau ikusteko? mesedez eta faborez! Azaroaren 5ean denok filma ikustera!

Noiz?

Azaroak 05 Osteguna / 19:45 Victoria Eugenia antzokia

Aste bete beranduago, Euskal Herriko 7 hiriburuetan eskainiko dute (emanaldi hauen leku eta orduak aurrerago zehaztuko dituzte).

Eta hortik aurrera zer? Beraien hitzetan:

“Ba mundua konkistatzera. Euskal Harriaren ABDak zure herriko zinema, kultur etxe, gaztetxe, taberna, zulo, tortura gela edo etxeko komunean eskaini nahi baduzu, jarri harremanetan gurekineuskalharriarenabdak@gmail.com helbidean eta harrizain bat bidaliko dugu nahi duzun lekura filmarekin (Ezkutatu baliozko gauzak bazpada ere. Gero ez esan abisatu ez genizunik…).”

Filmea 3 hilabeteetan zehar mugituko dute munduko txoko guztietan zehar (Deitzen dietenean bederen) eta world tour hori otsailaren 14an amaituko dute.

Baskin

(Can Evrenol)

Zeri buruzkoa da?

Ustekabean, infernurako bidea zeharkatuko duten polizia talde baten inguruko istorioa.

Zergatik ikusi?

Turkiatik datorren beldurrezko zinta odoltsua. Sitges-en aurkeztu zuten kritika nahiko positiboak lortuz. Clive Barker, John Carpenter eta Dario Argento bezalako zuzendarien kutsuak zipriztindua. Hasiera batean dirudiena baino serioagoa eta maltzurragoa.  Ezinbesteko bereziki, gorea-ren zaletu direnentzat.

Noiz?

 Urriak 31 Larunbata/ 00:30 Antzoki Zaharra

Curtain

(Jaron Henrie-McCrea)

Zeri buruzkoa da?

Bainugelako gortina bat, hori da tramaren erdian kokatzen den elementua. Hortik aurrera, gertakizun paranormalak alde guztietatik.

Zergatik ikusi?

Film txikia, xumea, diru gutxirekin eginikoa, baina premisa oso originala duena eta batez ere, ausarta. Diotenez, urteko film arraroenetarikoa izango da.

Noiz?

Azaroak 03 Asteartea / 17:00 / Antzoki Zaharra

The Witch

(Robert Eggers)

Zeri buruzkoa da?

Izenburuak dioen bezala, sorgin eta sorginkeriarekin inguruko istorioa.  XVII. mendeko Ingalaterran girotua.

Zergatik ikusi?

Jaialdi osotik film bakar bat ikusi behar baduzue, hauxe aukeratu.  Sundance-en saritua eta Sitges-en sekulako kritikak jasotakoa. Diotenez,  Robert Eggers zuzendariak, Shyamalan eta Haneke-ren arteko nahasketa bitxi-bikain bat sortzea lortu du. Gaurtik aurrera, beldurrezko film onenen zerrenda guztietan agertuko den filma, ziur.

Noiz?

Azaroak 01 Igandea / 19:45/ Antzoki Zaharra

We Are Still Here

(Ted Geoghegan)

Zeri buruzkoa da?

30 urtetik behin azaltzen den maldizio baten inguruko istorioa.

Zergatik ikusi?

Posterra eta trailerra ikuste hutsarekin antzeman daiteke, 70-80. hamarkadako beldurrezko filmei omenaldi bikain bat izango dela, naturaz gaindiko thriller ukituekin. Dibertigarria alde batetik, beldurgarria bestetik. Ez galdu.

Noiz?

Azaroak 01 Igandea/ 22:00/ Antzoki Zaharra

Azaroak 04 Asteazkena / 19:45 / Victoria Eugenia

Turbo Kid

(Anouk Whissell, François Simard, Yoann-Karl Whissell)

Zeri buruzkoa da?

“Mad max bizikleta gainean” bezala definitu dute film hau.

Zergatik ikusi?

Itxura post-apokaliptikoa duen filma. Dibertigarria, erromantikoa, robotikoa. Zalantzarik gabe Antzoki zaharreko aretoan sortzen den giroarekin, ikusi beharreko film horietakoa.  Sundance zinema jaialdian, ikusleen artean gogokoena izan zen.

Noiz?

Azaroak 05 Osteguna/ 22:00/  Antzoki Zaharra

German Angst

(Jörg Buttgereit, Goran Mimica, Michal Kosakowski)

Zeri buruzkoa da?

Alemaniatik datorren filma. Maitasuna, sexua eta heriotzari buruzko hiru kontakizun uztartzen dituena.  Nekromantik, Tears of Kali eta Zero Killed filmen zuzendariek eginikoa.

Zergatik ikusi?

Hainbat uneek nazka gaindiezina, baina era berean oso zinematografikoa eragiten dute. Probokazio bankete bat bezala definitu daiteke lan hau,  sabel bigunak uxatzeko modukoa.

Noiz?

Azaroak 03 Asteartea/ 22:00/Antzoki Zaharra

Film guztien aurkezpen bideoa