Munduko harresien eguneroko drama bi zuzendari euskaldunen telesail berrian

Atalak: Dokumentalak, Gomendioak, Telesailak

Berlingo harresia erortzean, bereizketa harresiak iraganean artxibatu genituen. Errealitateak justu kontrakoa dio, ordea. Sekula baino harresi gehiago daudela, egun. Milaka kilometro hesi, burdina-sare, txarrantxa zein harresi daude planetaren luze-zabal anitzean. Gero eta hesi gehiagok banatzen du mundua. Alde batean nahiz bestean daude gizakiak. Ez dago zertan eztabaidatu harresiok zentzugabeak edo logikoak, ezinbestekoak edo saihesgarriak diren. Hori da izan baita hain zuzen, Pablo Iraburu eta Migueltxo Molina zuzendarien helburua, Al otro lado dokumental sorta errodatzerako orduan; alde bateko nahiz besteko pertsonak funtsean berdinak direla erakustea.


Bi zuzendari euskaldunek  2012an Pura vida. The Ridge dokumental zoragarria estreinatu zutenean, soberan erakutsi zuten istorio zirraragarriak kontatzeko duten ahalmen eta trebetasuna.  2015eko Irailean aldiz, Donostiako Zinemaldiaren baitan, Walls (Harresiak) dokumentala estreinatu zuten. Film horrek, harresi arras ezberdin horien alde bietan bizi diren pertsonen zinezko istorioak zituen ardatz.  Alde bietan esperantza, beldur, pentsamendu, emozio eta bizirauteko gogo bera konpartitzen dela islatzen duten gertuko kontakizun biziak. Walls dokumentala motz geratu zitzaienez, bertan ikusi genituen istorioak luzatu eta sakon landu dituzte. Ia urtebete geroago, istorio hori abiapuntutzat hartuz, Discovery Max  kateak ekoizturiko telesail bat estreinatu dute: Al otro lado.

Pantaila txikiaren ahalmena erabiliz, lau ataletan, eroso, nahi dutena kontatzeko. Estatu Batuak eta Mexiko, Espainia eta Maroko, India eta Bangladesh, Hegoafrika eta Zimbabwe. Modu zuzen, erreal eta oso intimoa erabiliaz, telesail-dokumental honi esker bi aldeetan bizi diren gizakien istorioak ikusteko aukera izango dugu. Beraien bizitza hesi bati loturik baitago zuzenean; kontrabandistak, zelatariak, poliziak, migratzaileak… alde bateko nahiz besteko pertsonak, funtsean berdinak direla erakusteko intentzioarekin.
Atal guztiak nahieran ikusteko aukera: http://www.discoverymax.marca.com/series/otros/al-otro-lado/episodios-completos/#4867342317001