Zinemara, futbola ikustera (falta zena…)

Atalak: Hedabideak, Kirola

Jaume Roures, Mediapro taldearen sortzailea

Geroz eta jende gutxiago joaten da zinema aretoetara. Sarrera + kokakola + palomitak = 10 euro. Gehi aparkatzeko arazoak-eta. DVDak nagusitu dira. Oro har, futbol zelaietara ere geroz eta jende gutxiago joaten da. Telebista nagusitu zaie. “Eta futbol zelaiko giroa zinemara eramaten badugu?”. Jaume Roures Mediapro taldeko akziodunaren ideia da: 2009-2010 denboraldiko Espainiako Futbol Ligako partida onenak zinema aretoetan eskainiko dituzte.

Jaume Roures Bartzelonan jaio zen 1951n. Enpresari oso inportantea da, hedabideen eta zinemagintzaren sektorean influentzia handikoa. Mediapro taldearen sortzailea eta %33aren jabe da. Komunikabide eta enpresa ugarik osatzen dute Mediapro, horien artean Gol TV-k, eguneko 24 orduetan futbolaren inguruko saioak emititzen dituen ordainduzko LTD bidezko telebista kateak. Kontua da, Zapateroren Gobernuak eman beharreko baimenaren zain, Gol TV-k hilean 20-24 partida emateko asmoa duela, “soilik” 18 euroren truke: telebistaz eskainiko ditu, baina baita Internetez (zuzenean) eta telefono mugikorren bidez (laburpenak) ere. Ez hori bakarrik. Partidarik onenak zinema aretoetara eramateko asmoa du Rouresek. “Futbola ez da gehiago irekian (doan) emitituko”, adierazi berri du.

Badu motiborik horretarako. Berak erosi ditu futbol taldeen eskubideak: 2.000 milioi euro baino gehiago ordaindu du. Gastu horri aurre egiteko kontratuak sinatuko ditu zinema aretoekin. Partidak pantaila handian ikusi ahal izango dira, bereizmen handiko irudiekin eta Dolby soinuarekin. Eta sarrera kobratuko du, noski: 6 euro inguru, pelikulen kasuan bezala. Zinema aretoak pozik, futbolak jendea erakarriko duelako, eta Mediapro ere bai, jendeak dirua ekarriko duelako.

Jaume Roures Libération egunkarian

François Musseau kazetariak Jaume Roures enpresariari buruzko artikulua plazaratu zuen Frantziako Libération egunkarian pasa den urtarrilean, Citizen Katalan (Herritar katalana) izenburupean. Halaxe hasten da:

“Rupert Murdoch espainiarra deitzen dioten –katalanista eta ezkertiarra den arren– gizonak harritu egin gaitu. Madrilgo luxuzko hotel bateko lobbyan hartu ez bagintu, ez litzateke nabarituko hedabideen eta zinemaren munduko handi-mandia denik. Alabaina, bere igoera oso bizkorra izan da. Woody Allen-en Vicky Cristina Barcelona ekoiztu berri du, eta New Yorkeko zinemagilearen hurrengo hiru filmak finantzatzeko akordio batera heldu da. Prisa talde indartsua (El País, Canal + España, Cadena Ser) kinka larrian jarri du, futbol partiden emankizunen eskubideengatik borrokan hastean”.

Vertele.com-en artikuluaren gaztelaniazko itzulpena sareratu dute.