Sarkozy & Conroy, Internet with kondoi

Atalak: Hedabideak, Uncategorized

Strephen Conroy Australiako Gobernuko Komunikazio ministroa.

Nicolas Sarkozy, SGAE, Ramoncín… “egile eskubideen defendatzaile” ugari dugu inguruan, aliatuak batzuentzat, etsaiak besteentzat, guztiok entzun dugu noiz edo noiz eurei buruzko albiste edo komentariorik. Bada beste pertsonaia bat, Australiako Gobernuko Komunikazio ministroa, zerrenda horretan sartzeko meritu piloa egin dituena. Australia eta Internet. Ez dakit gaur arte herrialde hartako zibermunduari buruzko albisterik inoiz idatzi dudan. Ez dut uste. Horregatik harritu nau Interneteko jarduera positibo eta negatiboenak nabarmentzen dituen ISPA erakundeak Stephen Conroy ministroa eta haren Gobernua “pertsonaia doilorren zerrendan” sartu dituela ikusteak.

Slashdot web gunean aurkitu dugu ITNews agerkariaren erreportajera eraman gaituen artikulua. Internautek artxiboak legez kanpo partekatzerik ez du nahi ministro australiarrak, eta txosten bat prestatu du, Gobernuak eman beharreko pausoak biltzen dituena. Ekonomia digitala bultzatzea dute xede oraindik proposamen hutsak –intentzioz beterikoak, hori bai– diren neurri horiek. Conroy jaunak esku artean dituen asmoek bi norabidetan jotzen dute. Frantziarantz batetik, eta Zeelanda Berrirantz bestetik.

Frantzia. Sarkozy. “Hadopi” edo hiru abisuen legea. Hura du eredu Australiako Gobernuak. Interneteko artxiboak legez kanpo jaisten ari den erabiltzaileak bi abisuren ondoren amore ematen ez badu, administrazio publikoak konexioa etengo dio. Tira, Frantziako Senatuaren asmoa hori da, baina Batzorde Konstituzionalak lege polemikoa baliogabetu egin zuen duela hilabete inguru, konexioa mozteko ahalmena epaileak soilik duelako. Senatuak aldaketa batzuk –ez asko– egin ditu –azken erabakia adibidez epailearen esku utzi du– eta Batzorde Konstituzionalak astelehenean erabakiko du “Hadopi 2” legeari oniritzia eman ala ez. Onartuz gero, arau bihurtu eta irailean indarrean jarriko da. Portzierto, Sarkozy ere ISPAren “pertsonaia doilorren zerrendan” ageri da.

Zeelanda Berria. Egile Eskubideen Legea. 92A Sekzioa. Erabiltzailea copyright lizentziapean dauden artxiboak deskargatzeaz akusatzen badute, inolako epaiketarik egin gabe, Internet zerbitzu hornitzaileek (ISP) konexioa eten ahal izango diote. Zuzenean errudun. Lege horrek ere polemika handia sortu du eta Gobernuak atzera egin behar izan du. 92A-ren aurkako erabiltzaileek Internet Blackout mugimenduarekin bat egin dute. Zeelanda Berriko Gobernuaren asmoen inguruko informazio ugari aurkituko duzue webgune horretan.

Gobernuek, epaileek, ISP-ek… nork du konexioa eteteko ahalmena? Galdera horri behin betiko erantzun nahi diote zenbait agintarik. “Internautei konexioa eten behar al zaie?” modukoei aspaldi erantzun zieten.