Laino guztien azpitik

Atalak: Internet

AEBetako Garraio Publikoaren Segurtasun Agentziak badu herritarren parte hartzea bultzatzea xede duen blog bat (www.tsa.gov/blog), itxura batean ezer arrarorik ez duena. Itxura batean diogu, ezkutuan bada ere, zerbait grandiosoa izan behar duelako.

Bestela, ezin ulertu blog hori sortzeko George Bushen Gobernuak 600.000 dolar xahutu izana. “Milaka herritarrek doako tresnen bidez egiten dute-eta!”. Hori ez diogu guk (tira, ez guk bakarrik), Vivek Kundrak baizik, Gobernu federaleko azpiegitura informatikoen arduradun nagusi berriak. Cloud computing delakoaren alde egiteko adibide gisa jarri du Kundrak aipatu bloga.

Cloud computing. Azkenaldian maiz topatu dugu termino hori Interneten eta egunkarietan. Gaztelaniazko Wikipedian computación en nube deitzen diote, baina izenarekin bueltaka omen dabiltza oraindik. Euskaraz nola izendatu? Zer nahi duzue esatea, nik ez dakit. Konputazioa, zenbaketa, lainoa… Tira, kontua da Cloud computing terminoa erabiltzen dela sarean (eta ez erabiltzailearen ordenagailuan) dagoen software guztia izendatzeko. Lainoa Interneten metafora bat da.

Eredu digital hori indarra hartzen ari da, alegia, erabiltzaileen gailuak hustu eta softwarea sarera igotzea. Adituak abantailen eta desabantailen inguruko eztabaidetan murgildurik daude orain. Desabantailak: segurtasun eza (datuen pribatutasuna kolokan jartzen da), konexioaren gabeziak (sareak sendotu behar dira, bereziki operazio arriskugarrien kasuan) eta mesfidantza (erabiltzaileek euren artxiboen gainean kontrol gutxiago dutela sentitzen dute). Abantailak: erraztasuna (internautak lainora ohitu dira: posta elektronikoa, YouTube, Flickr…), erabilgarritasuna (edozein lekutatik eta gailu desberdinen bidez lan egin daiteke) eta prezio merkeagoa (gastuak murrizten dira, bai erabiltzaileentzako eta baita zerbitzariak kontrolatzen dituzten enpresentzako ere).

Gastuen murrizketa da, hain justu, Vivek Kundra AEBetako Gobernuko azpiegitura informatikoen arduradunak lainoaren alde egiteko arrazoi nagusia. Helburua da Administrazioak teknologian xahutzen duen diru kopurua (urtean 18.000 milioi dolar) murriztea. “Datuak prozesatzeko zentroak bat bestearen atzetik eraikitzen ditugu, eta zerbitzu asko bikoizturik daude”, dio Kundrak. Administrazio federalak zortzi datu-tratamenduko zentro ditu herrialde osoan sakabanatuta, eta Barne Departamenduak beste 23. “Sostengaezina da”.

Kundraren lan taldeak Apps.gov webgunea sortu du. Denda bat da. Administrazio desberdinek unean-uneko zerbitzuak aloka ditzakete, eta behar ez dituztenean ordaintzeari uzten diote. Zerga-kanpainak eta hondamendi naturalek sortutako kalteei aurre egiteko laguntza eskaerak dira zerbitzu horietako bi. Dirua aurrezteaz gain, zerbitzuen bikoizketa saihestu eta azkartasuna irabazten da. Gainera, Administrazioek erreminta teknologiko modernoenekin lan egingo dute. Kundrak, hori bai, laino ireki eta itxien arteko bereizketa egiten du. Itxiak dira, besteak beste, Armadaren eta Inteligentzia Zerbitzuen lainoak.

Lainoa, forma eta definizio aldetik, osatu gabe dago oraindik, baina AEBetako Gobernua hari begira badago, ziur ekaitza bazter guztietan lehertuko dela.