In your face… book

Atalak: Internet

Baditut bi lagun Facebook CIAk kontrolatzen duela diotenak. Duela urtebete-edo, sare soziala eta inteligentzia agentzia lotzen zituen albisteak irakurri genituen, baina aspaldian ez dut halakorik berriro entzun.

Egia denik ukatzera ez naiz ausartzen, baina kezkatu, kontu honek ez nau gehiegi kezkatzen. Ni ez nago Facebook-en (tipo hau ez naiz ni). Tira, esan nahi dut nik ez dudala gune propiorik Facebook-en, ze egon, ziur banagoela. Eta ez dut kontu propiorik batez ere alferkeriagatik (nahikoa denbora pasatzen dut bestela ere pantailari begira), ez atzean CIAren edo auskalo noren esku beltza sumatzen dudalako.

“Auskalo nor” esatean, segurtasun informatikoan adituek “kriminal” hitza erabiltzen dute sarri. Poliziek, noski, ere bai. Flickr, Facebook, Twitter eta halakoekin tentuz jokatzeko diote, edonork lapurtu diezagukeela gure identitatea, eta gure bizitzan uste baino sakonago lardaskatu. Baina poliziek badakite ere sare sozialak tresna oso baliagarriak izan daitezkeela “gaizkileak” harrapatzeko. Ziurrenik gogoan izango dituzue irailean Pozuelon (Madril, Espainia) gertatutako istiluak. Bai, horiexek, kale zurrutean ari ziren dozenaka gaztek dozena erdi polizia akorralatu zituztenekoak. Zenbait alborotatzailek YouTubera igo zituzten gau hartan grabatutako bideoak. Batzuek, beldurragatik-edo, azkar erretiratu zituzten irudiak, baina ordurako Polizia Nazionalak ikusiak (eta ongi gordeak) zituen. Aste honetan jakin dugu gazteek YouTubera igo zituzten bideoei esker, beste hiru pertsona atxilotu dituztela. Hiruak azaltzen omen dira bideoetan, poliziei botilak eta harriak jaurtitzen.

Bada, hori, kriminalek bai, baina poliziek ere ateratzen dietela etekinik sare sozialei. Bai, badakit, ez naiz ezer berria esaten ari. Gauza da nerabe garaiko anekdota batek txistea egiteko aukera ematen didala. Saskibaloi partida batean, ez dakit zein taldeko jokalari batek saskia birrindu zuen. Alegia, sekulako matea egin zuela beste taldeko jokalari baten muturren aurrean. Oinak lurrean jartzean –egoa zeruan zuen oraindik–, halaxe bota zion kontrarioari, saskibaloi-argotean: “In your face!”. Beste satelitearen erantzuna: “In your zer?”. In your Facebook.

Facebook CIArena da?

Galderari erantzuna eman nahian, azkenaldian gaiari buruzko ezer plazaratu ote den begiratu dut Interneten. Ernesto Carmonak Rebelion-en argitaratutako artikulu honekin egin dut topo: Facebook ¿es de la CIA?. Facebook-en proiektua aurrera ateratzeko CIAk 40 milioi dolarreko arrisku-kapitala inbertitu zuela dio, eta diru horri esker existitzen dela hizpide dugun sare soziala. CIAk egindako inbertsioen berri Tom Hodgkinson kazetari ingelesak eman zuen 2008an, The Guardian egunkariak plazaratutako erreportaje honetan: With friends like these….

Pascual Serrano kazetari espainiarraren hitzetan, CIAk agenteak erreklutatzeko eta informazioa pilatzeko erabiltzen du Facebook. Baita isilpeko operazioak antolatzeko ere. Eta ez CIAK soilik. Kolonbiako Gobernuak, FARCen aurkako nazioarteko eguna koordinatzeko erabili zuen 2008an. “Kanpaina horrek oraindik indarrean dagoen operazio propagandistikoa jarri zuen abian”, dio Serranok.

Nire bi lagunen esanak serioago hartuko ditut aurrerantzean…