Munillaren Seat Panda beltza

Atalak: Gizartea

Zumarraga-Urretxuko 'Otamotz' herri-aldizkariaren azala.

Jose Ignacio Munilla Gipuzkoako gotzain berriak orain adinako tximak zituen 1986an. Eta Seat Panda beltz bat. Eta euskaraz ederki egiten zuen. Jaunartzea berarekin egin genuen zumarratar zintzook gauza horiek ditugu gogoan. Horiek eta bere irribarre-erdi inkietantea.

Tira, jaunartzea ez genuen berarekin egin. Klaseak emakume talde batek eman zizkigun. Munillak, gehienera ere, bide zuzenari buruzko azalpen batzuk besterik ez zizkigun eman. Hasiberria zen oraindik.

Behin konfesatu gara. Ez dakigu jaunartzea egin baino lehenago ala ondoren. Lagunok komentatu dugu panelaren bestaldean zegoena Munilla izan zitekeela zela. Ez dakigu hiru Agur Maria errezatzera behartu gintuena bera ote zen, baina glamour handiagoa du hala izan zela imajinatzeak eta kontatzeak, beraz… Gogoan dut, armairutik atera ginenean, lagun bat eta ni elizaren erdialdean belaunikatu eta Munillari kontatutakoaz eta hark agindutakoaz hitz egiten hasi ginela.

“Ta, zuk zer esan diozu? Elizaren kanpoaldean harrika aritu garela ez, ezta?”

“Keba, soilik insulto batzuk esan ditudala”.

“Bai, nik ere bai. Eta amak esandakoa beti ez dudala egiten”.

“Aizu, zer arraio da Agur Maria bat? Zenbat irauten du?”.

“Ez dakit. Nik badut kronometroa. Egon gaitezen 3 minutu eta goazen kalera”.

Gero handitu egin ginen. Munilla ere bai. Gu elizatik urrundu ginen. Munilla ez, bera sakonago sartu zen. Hogei urte eman zituen Zumarragan, Andre Mariaren parrokiako apaiz-laguntzaile bezala lau urtez, eta El Salvador parrokiako erretore bezala hamasei urtez.

Jaunartzea egin ostean haren pista galdu genuen. Lagun ugari egin omen zituen Zumarragan, eta gazteak elizara erakarri. Gu ez, eliza barruan ezin zitekeen futbolean jokatu. Koxkortu ginenean, ordea, El Salvador auzoan eliza bat eraiki zuen. Amatiñok gogoan ditu Munillak fededunak garaje ziztrinetik atera eta eliza eder batera eraman zituenekoak. Munillaren izena bolo-bolo zebilen berriro. Elizak herritar ugari txunditu zituen, baina Ezker abertzaleak, adibidez, behin eta berriro salatu zuen Arau Ordezkatzaileek agindutakoaren aurka eraiki zela. Artean, gainera, bere “antinazionalismoa” geroz eta agerikoagoa zen, Juan José Tamayok El País egunkarian plazaratutako artikuluan dioen moduan.

Munillak Zumarragan utzitako arrastoari buruz gehiago jakin nahi baduzue, Zumarraga-Urretxuko Otamotz herri aldizkariaren webgunera jo dezakezue. Bai, badakit azalak beldur pixka bat eman dezakeela, baina pertsona askoren sentipenak ederki islatzen dituela uste dut. Mikel Iturriak eta Patxitrapero herrikideak ere idatzi dute Gipuzkoako gotzainari buruz. Eta Sustatun ere eman du zeresanik.

Bada, hori, hunkigarria izango dela Munilla Seat Panda beltz batean bisitan etortzea.