“Guardiola paradigma” eta Bulgaria anarkikoa

Atalak: Internet, Kirola

Jarraitzaile ugari du Pep Gurdiola futbol entrenatzaile kataluniarrak.

“Badakigu Guardiolaren fotoa zergatik sartu duzun”, esan genion duela bi aste Onintza Irureta lankideari, “nork irakurriko du bestela eleaniztasunari buruzko zure artikulua?”. Zuzen genbiltzan, erreportajeaz jende askok hitz egin baitigu. Badakit estrategia hori bere horretan plagiatzea, inolako aldaketarik egin gabe, apur bat lotsagarria dela. Baina, kasualitatez, Iñaki Irizarren Ekintzailetasuna blogeko artikulu bat irakurtzeko gomendatu didate aste honetan bertan, eta ezin trenari pasatzen utzi. Guardiolaren dekalogoa du izena, eta kontatzen du nola entrenatzaile kataluniarraren jarduna baliagarria izan daitekeen enpresa-proiektuak lideratzen dituzten barne-ekintzaile guztientzat.

Hauxek dira, laburturik, “Guardiolaren dekalogoa” osatzen duten bertuteak: Etenezinezko konpromisoa eta fideltasuna jokoaren estilo eta identitatearekin; taldea banakakoen gainetik; diziplina; harrobian konfiantza; kultura taktikoa; xehetasuna (arerio guztien aldez aurreko azterketa arduratsua); iraunkortasuna lanean; auto-exijentzia; talde kultura eta apaltasuna, ilusioa, adorea eta errespetua lehiakideari.

Irizarrek beste blog batetik abiatuta osatu du zerrenda: Paradigma Guardiola. Matias Manna kazetariak modako entrenatzailearen inguruko informazio, hausnarketa, argazki eta bideo anitz paratu du blog horretan. Haren pentsamoldeaz eta futbola ulertzeko moduaz maitemindua, “Guardiola paradigmak” zein ezaugarri dituen azaltzen digu Mannak. Kontzeptu nagusiak muntaia honetan bildu ditu, bost ataletan banatuta: Irekiak eta sakonak, Jokatzen atera, Defentsa aurreratua, Presio handia eta, gehien erakarri gaituen 74 posesioa izenekoa. 74 posesioa edo jabetza da baloia hanketan mantentzea, jokoa dominatu eta taldea antolatzeko. Geroz eta ukitu gehiago, taldearentzat orduan eta baldintza hobeak. Paseak geroz eta azkarragoak izan, arerioa orduan eta azkarrago nekatuko da. Guardiolarentzat, baloiaren jabetzak %70ekoa baino altuagoa izan behar du partida batean. Mannak 74a aukeratu du, 1974ko Munduko Txapelketan jabetzaren bidez taldea nola antolatu erakutsi zigun Holanda haren ikur gisa. Data hura urrunegi geratzen zait. Ez, ordea, 1994a, oroimenean bederen. AEBko Munduko Futbol Txapelketa. Uste dut orduan egin nintzela Italiazale, Brasilen aurkako finalean Roberto Baggiok penaltia huts egin zuenean.

Uste dut orduan egin ginela guztiok apur bat Bulgariazale, Hristo Stoitchkov handiak gidatutako gizon koadrila anarkiko hark (Ivanov tximaluzeak-eta) AEBetako futbol estadioetan –eta hoteletan– euren izaera bereziaren berri eman zutenean. Tira, anarkiko esan dugu, baina Munduko Txapelketa horretan final-erdietaraino heldu ziren! Alegia, eta hau nik ateratako ondorio prezipitatu eta interesatua besterik ez da, arrakasta izateko ez da derrigorrez “Guardiola paradigma” bete behar. Badira beste alternatiba batzuk, dekalogo hain elegantea ez duten arren…