Y272, Barcina gastronomiko-zoologikoa

Atalak: Uncategorized

Y272: Yolanda en tu pueblo. Izen hori du Yolanda Barcina UPNko presidenteak hauteskundeetara begira abiarazitako kanpainak. “UPNko presidente izendatu nindutenean, erronka bat jarri nion nire buruari: Nafarroako Gobernuko presidentetzarako hautagai izan baino lehen, gure Komunitateko udalerri guztiak –272– bisitatzea”, dio Barcinak kanpainaren webgunean. Bere helburua ez omen zen “errekorrak haustea”, herritarrekin kalean aurrez-aurre hitz egitea baizik, nola bizi diren ezagutzea, euren kezkak zeintzuk diren jakitea… alegia, “entzun eta ikastea”.

Yolandaren ibilbide turistikoak argazki ponpoxoak eta Nafarroari buruzko gogoeta oso sakonak utzi ditu. Dioenez, Lanako patata poltsa batekin itzuli zen etxera egun batean, Faltzesko baratxuri-korda batekin beste batean, edo Vianako galletekin, Milagroko entsalada poltsekin, Jaizko gatzarekin, Ablitasko olioarekin, Erronkariko gaztarekin. “Zenbat jan duzun, Yolanda!”, dio webgunean.

Itzulia gastronomikoki aberasgarria izan bada, animaliek ere kapitulu propioa merezi dute: Ariako ardiak, Urrotzeko zaldiak, Luzaideko putreak, Erronkariko hartza, Ezkurrako eta festetan zeuden herrietako behiak… “baita Etxarri bisitatu nueneko arrain hori ere”. Etxarriko arrain bat?! Mapara joan eta Etxarri-Aranatz gainean klik egin dugu, arrainari buruzko informazio gehiago irakurtzeko. Alferrik. Hausnarketa sozio-politiko oso serioa irakurri dugu:

Ostirala zen, eta jende ugari zebilen tabernetan baxoerdiak edaten. Kotxetik jaitsi bezain pronto, pertsona batzuk ni iraintzen hasi ziren. Momentu desatseginak izan ziren, baina leku guztietan dago animatu eta indarra ematen dizun jendea. Kotxerantz itzultzean, neska gazte batek, hitz gutxi batzuekin ulertarazi zidan Etxarri-Aranatzen jende tolerante eta adeitsua bizi dela. Pertsona horiengatik egin behar da lan Nafarroako herri guztietan, bataila ez dezaten irabazi irainak, indarkeriak eta beldurrak”.

Eta arraina, non dago Etxarriko arraina?

Huts baten zuzenketa: Dio, nahastu egin naiz, “Echarriz” ari zen, Etxarri Etxauribarrez, ez Etxarri-Aranatzez! Arraina hango iturri batean zegoen!

Ea zer dioen Altsasuz, Etxarri-Aranatzetik hurbil dagoen udalerri bat aukeratzearren… Mamma mia, ezin liteke! Beitu, beitu:

Sarri izan naiz han, Jubilatuen egoitzan, La Encinako Extremadurako Etxean, lagun on batzuen etxeetan… Gogoan dut bereziki Gabonetako arratsalde bat: herriko haurrek bazkalostea alaitu zidaten euren gabon-kantekin”.

Listo, hori da guztia.

Barcinak lortu omen du nahi zuena: herritarren kezkak bere egin eta Nafarroaren aniztasuna bertatik-bertara ezagutzea. 272 herrietako seinaleez ariko da…

Eguneraketa (Ez da txistea): Lankide batek Orreagan sartzeko esan dit. Yolandak dio:

Ahuntz granja bat bisitatu dut, animalia bakoitzak ematen duen esne kopurua kalkulatzeko sistema elektroniko modernoak dituena.

Luis Echeverria alkatearen erantzuna:

Barkatu zuzentzea. Ardiak dira, ez ahuntzak.

Hori hala bada…