Nora hoa, Mugipuzkoa?
96 kilometro 3 ordutan egiten ditugu guk. Horrela bai!
Zumarraga (hangoa naiz) eta Lasarte-Oria (han lan egiten dut) artean 48 kilometro daude. 120 kilometro orduko abiadura gainditzen duenean dardarka hasten zaidan autoan etorriz gero 35-40 minutu behar izaten ditut bidea osatzeko, eta garraio publikoa erabilita ordubete eta laurdenetik gora. Kontuan izan Renferen bi tren eta TSST konpainiako autobus bat hartu behar ditudala.
Joan-etorria (96 km), beraz, autoan ordubete eta laurdenean egiten dut, eta garraio publikoa erabilita ia 3 ordutan. Denbora horretan, lanak partituz gero, Haile Gebrselassie eta Duncan Kibet atleta afrikarrek maratoi eta erdi –64 kilometro inguru– egingo lukete. Eta Beñat Intxausti, Haimar Zubeldia eta Markel Irizar ziklistek, 140 kilometroren bueltan. Badakit edozein pertsonak ezin duela marka hori egin, baina…
Jarrai dezagun. Hiru orduko tartean distantzia hauek osatuko genituzke:
Autoan: 300 kilometro
Bizikletan: 140 kilometro.
Garraio publikoan: 96 kilometro.
Korrika: 64 kilometro.
Edo, beste modu batera esanda, 96 kilometro egiteko denbora hau beharko genuke:
Autoan: Ordubete eta 15 minutu.
Bizikletan: 2 ordu.
Garraio publikoan: 3 ordu.
Korrika: 4 ordu eta erdi.
Horregatik haserretu nintzen atzoko egunkarietan zera irakurtzean: “Garraiobide publikoak erabilita Gipuzkoan barrena ibiltzea inoiz baino errazagoa da www.mugipuzkoa.com webguneari esker. Izan ere, lurraldeko garraiobide publiko guztien informazioa gune bakarrean biltzen baitu”. Ez, jaun-andreok, ez. Errazagoa ez da Gipuzkoan barrena ibiltzea, Gipuzkoan barrena ibiltzen hasteko beharrezko informazioa lortzea baizik. Ez da gutxi, baina ez da nahikoa, ezta gutxiago ere. Google Maps-ek Everest puntara nola heldu behar naizen esanda ere, nekez lortuko dut bidea osatzea.
Bidaiaren iraupena, erosotasuna eta, neurri apalagoan, baita prezioa ere. Hiru horiek hobetzean izango da errazagoa garraiobide publikoak erabilita Gipuzkoan barrena ibiltzea. Bitartean…
Hiretzat isuna. Oraindik ez al dakik ezin dela 120 km.ordukoan ibili? 110 duk oraingoa, bestela nola demontre aurreztuko diagu gasoila?
Gainera ez adi kexatu, laister AHT izango diagu eta hori hartu eta zakarrak Zubietako erraustegira ekarri ahalko diagu tren berean, ia ia zakarrak sortu, ostia legalizatuta baldin bada, baino lehenago birziklatu ahal izango diagu. Beti kexatzen ari zarete.