Ainhoa Murua: “Joko Olinpikoak irabaziz gero, lau urterako zara txapelduna”

Atalak: Kirol psikologia

Londresekoak hirugarren Joko Olinpikoak izango dira Muruarentzat (Argazkia: Andoni Canellada / Argazki Press)

Ainhoa Murua triatloilari zarauztarra hirugarrenez lehiatuko da Joko Olinpikoetan. Abuztuaren 4an egingo da emakumezkoen proba Londreseko Hyde Park-en. 1.500 metro igerian, 43 kilometro bizikletan eta 10 kilometro korrika. Atenasen (2004an) 24. bukatu zuen eta Beijingen (2008) 28.

Ondorengo lerroetan kirol psikologiari buruzko LARRUNen sartzerik izan ez ditudan galdera-erantzunak bildu ditut. Apur bat desordenaturik daude, baina egoki ikusi dut hemen sartzea, bereziki Londreseko Joko Olinpikoez mintzo direnak. “Badakit hobe egin dezakedala, Sydney-en bezala –6. sailkatu zen Munduko Serietako aurreneko proban– esaterako, baina baita 35. buka dezakedala ere”, dio. “Lasterketa apur bat oker baldin badoa, postu asko atzera daitezke, maila oso altua dagoelako”.

Joko Olinpikoak bereziak dira…

Bai, zalantzarik gabe. Lau urtean behin egiten dira eta oihartzun handia dute. Olinpiar jokoak irabaziz gero, lau urterako zara txapelduna. Baina gero, lehiatzerako orduan, ez dago alde handirik. Londresen izango garenak urte osoko lasterketetan elkarrekin lehiatzen gara. Alde horretatik gauza bera izango da. Hedabide gehiagok jarraituko gaituzte, hori bai. Inguruan zalaparta handiagoa egongo da, jendea gainean duzu, familia, lagunak… baina behin lasterketan zaudenean, gauza bera izango da.

Irteeran zaudela zertan pentsatzen duzu?

Ongi kokatzea da garrantzitsuena, igeriketa proba ongi hastea. Irteera txar bateak lasterketa osoa baldintza dezake. Hasieran hori besterik ez duzu buruan, ongi abiatzea. Urduritasun denak igeriketa proban zentraturik daude. Gero, bizikletan, ikusten hasten zara noraino hel zaitezkeen, korrika egiten hasterako nekaturik egongo zaren…

Zure kontroletik at dauden faktoreek, eguraldiak esaterako, kezkatzen zaituzte?

Kirolari bakoitzak lehiatzean nahiago du faktore batzuk egotea. Nik uste dut inork ez duela sekulako berorik nahi, baina agian, baldin badakizu besteak zuk baino gehiago sufritzen duela beroarekin, ba nahiago duzu eguzkiak jotzea. Berdin hotzarekin, euriarekin… Garai batean beroarekin txarto pasatzen nuen, sabelarekin arazoak izaten nituen, eta buruari buelta gehiago ematen nizkion. Orain pentsatzen dut: ‘Datorrena etorriko da’.

Gogor entrenatzen zara. Beheraldia duzunean nola motibatzen zara berriro?

Ia egunero entrenatzen naiz. Obsesioa da ia. Neguan, lehiatzen hasi arte, ez dugu besterik egiten: entrenatu, entrenatu eta entrenatu. Gorputza nekatu egiten da, eta burua ere bai. Motibazio baxuko momentuak bizitzen dituzu. Goiz jaikitzeak adibidez izorratu egiten zaitu… Gehien motibatzen nauena lehiatzen hasi eta gauzak ongi ateratzen zaizkidala ikustea da, indarra ematen dit.

Orain ari naiz emaitza onenak lortzen, jendeak zoriondu egiten zaitu, baina badakizu berdin-berdin entrenatzen jarraitu behar duzula. Errendimendua apur bat jaisten badut, asko egingo dut atzera. Gauzak ez dira zorteagatik ateratzen, gogor lan egin behar da.

Joko Olinpikoetarako lehenengoz sailkatu zara zuzenean. Plaza hori gertuko kirolariren batekin (edo lagun batekin) jokatzean zer sentitzen da?

Aurrekoetan azken unera arte borrokatu dut. Ziklo olinpikoa lau urtekoa da, baina triatloian bi urte lehenago hasten dira puntuazioak-eta. Hitzordua geroz eta gertuago egon, orduan eta tentsio handiagoa sortzen da. Lehiaketa bakoitzean tentsioa sortzen da. Selekzionatzaileak (hautatzaileak) irizpideak jartzen ditu, eta kirolari denak ez daude ados, ez triatloian, ezta beste kiroletan ere. Zerrendak ateratzen direnean, normalean arazoak sortzen dira.

Kirolariek pentsatzen al duzue erretiroan?

Bai, bereziki adinean aurrera zoazela. Egia da helbururen bat duzunean, aurten Joko Olinpikoak dauden bezala, dena ahazten duzula. Hala ere, bai, erretiroak estres puntu bat sortzen dizu batzuetan. Entrenatzen hiruzpalau ordu ematen dituzunean, luze pentsatzeko denbora ematen dizu… Batzuetan bai pentsatzen duzula zuk kirolari dena eman diozula, eta gero berak… Tira, oso argi daukat hau bukatu egingo dela.