Euskal Herriko itzulia: Lehoi bihotza eta cannabis usaina

Atalak: Kirola

Gauza kuriosoak irakurtzen ari gara egunotan Twitterren, Euskal Herriko txirrindulari itzuliaren inguruan.

Jens Voigt ziklista alemaniarrak, duela bi urte Euskal Herriko zaletuei esker oneko gutuna idatzi zienak, Amets Txurrukari txio bat eskaini zion atzo, Etxebarriakoa Itzuliko lehendabiziko bi etapetan ihesean ibili dela-eta. Txioa bitxia da, euskaraz zuzentzen baitzaio Voigt Ametsi.

Txurruka = Lehoi bihotza !! Izugarria Ametsek egin duena! He has a lionheart and my deepest respect!! 2 days alone in breakaway in a row!!

— Jens Voigt (@thejensie) 2013 apirila 2

Philippe Gilbert ziklista belgikarrak, Munduko Txapeldun eta duela hiru aste flandriar “separatismoaz” adierazpen polemikoak egin zituenak, txio bat eskaini zien atzo Euskal Herriko zaletuei, darien usaina dela-eta.

I like to inhale cannabis in every single climb of this race. Pais vasco.

— PHILIPPE GILBERT (@PhilippeGilbert) 2013 apirila 2

Agian ez da zehazki bide ertzeko zaletuei buruz ari, mendateak igotzen ari direnean ziklistek ezker-eskuin uzten dituzten zelaiez baizik, auskalo. Berdin du, tipoak usaimen izugarri ona duenik ezin ukatu. Tartean behin motorrean doazen ertzainengana zergatik hurbiltzen den badakigu: “Hemen, ezkerretara, marihuana plantazio bat dago, fijo”, “laranjaz jantzita dauden zaletu horiek dozena erdi peta erre dituzte gutxienez”… Ez dut esango egia ez denik, petak erretzearena esan nahi dut, baina (barka demagogia txiste txarra) tropelean berarekin doazen txirrindulariek ere ez dute usain ederra izango…