Abiadurak izutzen duen txirrindularia

Atalak: Txirrindularitza

Thibaut Pinot frantziarra etsipenaren ateetan utzi du jaitsierei dien beldurrak. (Argazkia: La Depeche)

“Pertsona batzuek armiarma eta sugeei diete beldur. Nik abiadurari. Fobia diot”. Thibaut Pinot 23 urteko ziklista frantziarraren hitzak dira, iaz Frantziako Tourra 10. bukatu zuen baina aurten maldan behera zurrun, trakets eta geldo ikusi dugun ziklistarenak.

Nekez onartzen dituzte kirolari profesionalek euren beldur mamuak. Jainkoen pare ipintzen ditugu maiz, eta halaxe ageri dira eurak, kamera eta mikrofonoak aurrean dituztenean bederen. “Nik ez diot ezerri beldur. Errespetua bai, baina beldurrik ez”. Zenbat bider entzun ote dugu gauza bera?

Horregatik harritu nau Pinotek esandakoak. Gorputza blokeatu dioten sentipenak azaleratu ditu L’Equipe-n, kazetariek galdetu diotenean ea zergatik ibili den hain larri Pirinioetako bihurguneetan.

“Mendian behera Mark Cavendish bezalako txirrindulari baten gurpilari jarraitzerik ez nuela ikusi nuenean, nire buruari zera galdetu nion: ‘Zer ari naiz egiten Tourrean?’. Erantzuna argi neukan: Ez dut zereginik. Egoera oso tristea da. Nire buruari huts egin diot”.

Kazetarien hitzetan, Pinotek aldapan behera dituen arazoek trauma bati erantzuten diote. Gaztetxoa zenean erorikoa izan zuen, eta beldurra gorputzean sartua du oraindik. “Ez dakit trauma hori sekula gaindituko dudan”, esan zuen etsituta frantziar gazteak, Pailhères-eko etapa amaitzean. “Gaurko etapan nire helburu bakarra bizirautea zen. Ez dakit indarberrituko naizen, baina bizitza horrelakoa da. Txirrindularitza halakoa da”.

Pirinioetako etapetan autoan jarraitu dion Thierry Bricaud FDJko zuzendariak adierazi duenez, Pinotek deskonektatu egin zuenean hura “salbu mantentzen” saiatu ziren, “errenditu eta lasterketa utzi ez zezan”. Aginduetara duen ziklista oraindik oso gaztea dela dio: “Jostailua hautsi zaion umearen modukoa da Pinot”.

Wiggins: “Neskatila bat bezala jaitsi naiz”

Bradley Wiggins, pasa den Giroan.

Italiako Giroan, Bradley Wiggins txirrindulari britainiarrak majo sufritu zuen jaitsieratan, beldurrak airean, eroriko bat izan ondoren. “Izan gaitezen zintzoak. Erorketaren ostean neskatila baten moduan jaitsi nintzen. Ez da neskatilekiko errespetu falta. Nik etxean badut bat. Baina bizitza horrelakoa da. Aurrera begiratu eta desengainuak gainditu egin behar dira”, adierazi zuen pasa den urtean Tourra irabazi zuen ziklistak.

“Nola ez dela errespetu falta?”, dio Lucy Kinder The Telegraph-eko kazetariak: “Wiggins bere hitzak justifikatzen saiatu da. Aditzera eman du “haur” bat bezala jaitsi zela esan nahi zuela. Baina ez zuen esan “mutiko bat bezala”. Horrek ez zuen inpaktu bera izango. “Neskatila bat bezala” jaitsi zela esatean, mundu guztiak ulertu zuen Wigginsek zer esan nahi zuen. Bizikletan mutiko bat bezala ibiltzeak ez du ahuldaderik azaleratzen, eta neskatoen kasuan ordea bai”.

“Ziur naiz Wiggins ez dela sexista. Hala ez izatea espero dut behintzat. Hala ere, ustez minik emango ez duten adierazpenak egin aurretik gauzak hobeto pentsatu behar ditu. Neskatilek nahikoa oztopo gainditu behar dituzte jada kirol esparruan arrakasta lortzeko. Miresten duten norbaitek mutikoak baino ahulagoak direla esateak ez du batere mesederik egiten”.