RhGas6: Dopinari irekitako ate berria?

Atalak: Dopina

Zer da RhGas6 delakoa? Ba al du loturarik dopinarekin? Pasaporte biologikoak detekta al dezake? Erantzun erabat zehatzak ematea zaila dela dioen arren, azalpen aberasgarriak eman ditu J.J. Muruzabalek (@Mr_Chon) txirrindularitzari buruzko Cobbles&Hills webgunean.

Pasaporte biologikoak errazago detekta ditzake EPO mailaren irregulartasunak, RhGas6 balio anormalak baino.

Dopinari irekitako ate arriskutsua idatzi du goiburuan, webgune espezializatuak haizatzen hasi diren substantziaz mintzo. Galdera-erantzunak laburrean jaso ditut nik, euskarara ekarrita.

Zer da Gas6 delakoa?

Proteina bat da, organismoaren ehun batzuetan –odol zeluletan esaterako– dagoen substantzia endogenoa.

Gas6 giza-birkonbinatua (RhGas6) 10-20 µg-ko dosietan aurkezten da eta 300-500 euroko prezioa du.

Zein eragin du organismoarengan?

2001az geroztik animaliekin egindako esperimentuek erakusten dutenez, RhGas6 birkonbinatuak plaketa-agregazioa eta ateroma-plaken eraketa bultzatzen ditu.

Halaber, hematokrito maila handitzen du, 2008an arratoi anemiko batzuekin egindako esperimentuek erakutsi zuten moduan.

Dopinarekin zein lotura du?

Eritropoietinaren (EPO) antzeko efektua du. Hematokrito maila handitzen duenez, oxigeno gehiago garraia daiteke odoletik muskuluetara, eta hobetu egiten du kirolariaren errendimendua.

EPO exogenoa eta RhGas6

Hematokrito baxua duten pazienteengan  –anemikoengan– eraginkortasun handiagoa du EPOak baino. Aldiz, balio “normalak” erakusten dituzten pazienteengan, EPOa eraginkorragoa da.

RhGas6 eta EPOa ez dira substantzia antagonikoak, osagarriak baizik.

Debekaturik al dago?

Dopinaren Aurkako Nazioarteko Agentziaren (WADA-AMA) kodeak ez du esplizituki debekatzen, baina inplizituki bai, “Odolaren manipulazioa” atalean (1. puntua): “Debekaturik dago edozein odol kantitate, zelula gorri edota hemoderibatuak administratu edo berriro sartzea”.

Kontrol batean detektatzerik ba al dago?

Detekta liteke, baina ezingo lirateke forma endogenoa (Gas6) eta birkonbinatua (RhGas6) berezitu.

Pasaporte biologikoak atzemango al luke?

Ez du ezkutuan pasatzerik lortzen, baina irregulartasunak aurkitzea EPOaren kasuan baino zailagoa da.

Zein ondorio du RhGas6 erabiltzeak?

Sustantzia arriskutsua da, eta potentzialki kantzerigenoa.

Gas6 proteinari buruzko informazio gehiago ingelesez:

• Gas6-ren eragina eritropoiesian eta arratoien anemian (pdf). [Eritropoiesiaz euskarazko Wikipedian]
• Gas6 eta hemostasia baskularra.
• Gas6-ren eragina giza plasma eta plaketetan.
• Gas6-ri buruzko eztabaida Cyclingnews-eko foroetan.