Euskaltel Euskadiren agurrari buruz

Atalak: Txirrindularitza

Euskalteleko ziklistak, iragan Giroan.

Euskaltel Euskadi txirrindulari taldearen agurrak oporren atarian harrapatu ninduen. Bizpahiru asteko deskonexio-tartearen ostean, majo kosta zait gertatutakoaren inguruko informazioa bildu eta interpretatzea. Euskadi Irratiko azalpen mamitsuek jarri naute arrastoan.

Pasa den asteazkenean, Espainiako Vueltako etaparen kontakizunaren erdian, Joxe Mari Apaolazak, Xabier Artetxek eta bereziki Xabier Usabiagak taldearen desagerpenari buruzko datu esanguratsuak eman zizkiguten, eta horiei tiraka osatu dut post luze hau, ideiak ordenatu aldera.

Zergatik desagertu da taldea?

Arrazoiak ekonomikoak dira, taldeko arduradunen kudeaketa (askoren ustez) txarraren gainetik. Alde ekonomikoari helduko diot lehendabizi:

Euskaltelen hitzetan, instituzioek laguntzak kendu ostean –krisiak bultzatuta– bigarren babesle pribaturik aurkitu ez dutelako desagertuko da taldea. Aldiz, instituzioek diotenez, iazko abenduan Euskaltelen akzioen %48,1 erosi zuten bi inbertsio funtsek (Trilantic-ek eta Investindustrial-ek) ez dute interesik puntako txirrindularitzan, eta beste marketin eredu batzuen alde egin dute, nolabait esatearren. “Agintean den alderdiko legebiltzarkide batek” eman zizkion azalpenetan oinarrituta hitz egin zuen irratian Usabiagak.

Ez zuten zuzenean halakorik esan, baina Euskadi Irratiko solaskideek sinesgarritasun handiagoa taldearen bertsioari ematen ziotela sumatu nuen. Alegia, instituzioek laguntzak kendu dizkiotelako desagertuko dela taldea.

Euskaltel konpainia

Kapitalaren %48,1 aipatu inbertsio funtsen esku dago. Orotara 228 milioi euro inguru ordaindu zituzten akzioengatik.

Kutxabankek akzioen %49,9 du, eta Iberdrolak gainerako %2a.

Informazio gehiago: Wikipedia.

Euskaltel Euskadi taldea

Euskaltelek urtero 3,5 milioi euroko ekarpena egiten zion txirrindulari taldeari. Aurtengo denboraldian Eusko Jaurlaritzak eta Bizkaiko eta Gipuzkoako diputazioek laguntzak kendu ostean, telekomunikazio konpainiak 7 milioi euroko ekarpena egin behar izan du.

Taldeko arduradunak saiatu dira bigarren babesle pribatu bat aurkitzen, baina ez dute lortzerik izan. “Proiektua ez da bideragarria”, adierazi dute.

Lau urterako plana sei hilabetean agortu da

“Taldearen kudeaketa ez da ona izan”, adierazi du Roberto Laisekak, 1994tik 2006ra bitartean Euskaltel Euskadi taldean aritu zen ziklistak. Ekipoak txirrindulari atzerritarrak fitxatu ditu aurten, lau urterako UCI World Tour (UWT) lizentzia eskuratu ahal izateko. Laburrean azaltzeko: UWT mailan lehiatu ahal izateko, txirrindulariek lortutako emaitzen araberako gutxieneko puntu kopurua izan behar dute taldeek (diru kopuru jakina jartzeaz gain, noski), eta puntu horiek atzerriko txirrindulariei esker lortu ditu Euskadik, fitxaketa berriek emaitza penagarriak eman dituzten arren: Tarik Chaoufi marokoarra taldetik bota dute egokitu ez delako, Aleksandr Serebriakov errusiarrak EPO bidezko positiboa eman zuen eta hura ere bota egin zuten, André Schulze alemaniarrak lasterketa bakarra amaitu du…

Aldiz, nahikoa punturik ez zuelako taldetik kanporatu zuten Amets Txurrukak emaitza politak lortu eta borrokarako gogoa erakutsi du Caja Rural taldean, eta horrek are lotsagarriago utzi ditu Ivan Velasco ere kanporatu zuten Euskaltel Euskadiko arduradunak. Filosofia aldaketak ez dio batere mesederik egin taldeari. Han aritutako hainbat txirrindularik zuzendarien jarrera gogor kritikatu zuten, eta errepideak laranja kolorez zipriztindu dituzten zaleak geroz eta urrunago ditu.

Harrigarriena zera da: Taldeak lau urterako apustu sendoa egin zuela, eta proiektua sei hilabetean amaitu dela. “Taldeko arduradunek bazekiten instituzioek euren ekarpena kendu egingo zutela, eta hala ere filosofia aldatu zuen”, kritikatu du Laisekak.

Biciciclismo webgunean aurkitu dugu azalpen gehiago: “2012an, guztia arrosa kolorekoa zenean, lau urterako proiektu estrategikoa aurkeztu zenean, Euskaltelek taldearen kudeaketa Basque Cycling Pro Team sozietatearekin hartu zuenean –Euskadi Fundazioaren lekuan–, 36 milioi euroko aurrekontuaz hitz egin zen. Aldiz, pasa den martxorako jakina zen jarraipena arriskuan zegoela, arrazoi ekonomikoengatik. Inork ez du egoera hau ulertzen, ezta Igor Gonzalez de Galdeano managerrak ere”. Taldean halakorik espero ez bazuten, pentsa nola geratuko ginen txirrindularitza jarraitzen dugun zaleak.

Fundazioarekin gertatutakoak ez du zerikusirik

Euskadi Fundazioak kontinental mailako taldea du orain.

2012an, polemika bizi baten erdian, hemeretzi urtean proiektua babestu zuen Euskadi Fundazioa proiektutik kanporatu zuten, eta Euskaltelek hartu zuen aurrekontu eta kudeaketaren ardura. Auziak Euskaltel Euskadiren desagerpenarekin loturarik ba ote duen galdetzean, ezetz erantzun zuen Xabier Usabiagak irratian, aparteko bi kontu direla.

Taldea ez desagertzeko aukerarik ba al dago oraindik?

Ez. Erabakia behin betikoa da. Arduradunek jakinarazi dute proiektua “modu ordenatu eta arduratsuan” itxiko dela, eta txirrindulariak talde bila ari dira jada. Bakarren batzuk lotua dute datorren denboraldirako ekipoa, baina beste batzuek gorriak ikusiko dituzte, Usabiagak adierazi bezala. Izan ere, Gorka Izagirre moduko txirrindulariari taldea aurkitzeak uste baino denbora gehiago eman badio, maila apalagokoei eta beteranoenei are gehiago kostako zaie.

Kontuan hartu behar da, bestalde, hamalau txirrindularik kontratua indarrean daukatela 2014rako. Beraz, kontratu horiek ordaindu nahi ez baditu, Basque Cycling Pro Team beharturik dago ziklistei talde berria aurkitzen saiatzea. Esaterako, kasu hipotetiko baten bidez aipatzearren, demagun Mikel Nievek 10 milioi euro kobratzen dituela, eta Astanak 6 milioi eskaini dizkiola. Gainerakoa Euskaltelek ordaindu beharko luke.

Eta aurrera begira zer?

Ez da zalantzarik Euskaltel Euskadik hutsune handia lagako duela.

Afizionatu mailako txirrindularitza egoera larrian dago gurean –Xabier Artetxek Euskadi Irratian nabarmendu zuen gure errepideetan egiten ziren bost lasterketa nagusietatik bakarra dagoela bizirik, ongi ulertu banion–, eta ziklista gazteek geroz eta aukera gutxiago dute goi mailako taldeetara salto egiteko. Euskadik betetzen zuen neurri handi batean funtzio hori, baina hemendik aurrera… amets potoloegiak zituen eta euskal txirrindularitzak garesti ordainduko du.

Informazio gehiago:

Ohi bezala, Tropela.net-eko kideak ere azti ibili dira, eta Euskaltel-Euskadiren desagerpenari buruzko podcasta sareratu dute gaur bertan. Sagua grabazioaren parte batera eraman dut ausaz, eta solaskideetako batek esan du gertatutakoa ezin daitekeela azken bi urteetan ikusitakoaren arabera azaldu. Kontua ez dela Madariagak gauzak ongi egin zituela eta Gonzalez de Galdeanok gaizki. Gauzak konplexuagoak direla.

Ea asteburuan tartetxo bat hartzen dudan podcast osoa entzuteko.