Euskalteleko langileek ez dute Alonsoren taldean jarraituko
Euskalteleko ziklistak eta staff teknikoa, Espainiako Itzuliko podiumean (@mikelastarloza)
Datorren urterako kontraturik ez duten Euskaltel Euskadiko ziklistek Fernando Alonsoren taldean jarraituko ez zutela bagenekien, baita kontratuak dauzkaten batzuek ere taldea laga dezaketela. Baina pentsatzen ez genuena da –nik behintzat usaindu ere ez nuen egin– Igor Gonzalez de Galdeano managerra eta haren lantaldea kanporatuko egingo dituztela. Hori da behintzat Alonsoren asmoa, El Periódico egunkariak plazaratu duenez.
2015etik aurrerako panorama iluna zela bagenekien, baina datorren urtean Euskaltel Euskadiren egiturak nolabaiteko jarraikortasuna izango zuela uste genuen. Tropela.net webgunean irakurri ditugu proiektu berriaren ingurukoak:
– Igor Gonzalez de Galdeanok eta bere zuzendaritzako lantaldeak (mekanikari, mediku eta abarrek) ez dute taldean jarraituko.
– Kaleratze akordio baketsuak lortzea izango litzateke Alonsoren asmoa, salbuespenak izan daitezkeen arren.
– Kiko Garcia izango da manager nagusia. ONCEko txirrindulari ohia, Oakley betaurrekoen ordezkaria da Europan. Alonsoren babesle pribatuetako bat da Oakley.
– Formula1-eko pilotuaren nahia da Chechu Rubiera izatea kirol-zuzendaria. Txirrindulari ohi eta Alonsoren lagun, oraindik ez du lortu kirol-zuzendari izateko UCI titulua.
– Jabe berrien asmoa da 16 txirrindulari fitxatzea eta indarrean dauden kontratuak errespetatzea. Ez dago argi bigarren multzokoekin azkenean zer gertatuko den. Ziur jarraituko duten ziklistetako bi Igor Anton eta Samuel Sanchez dira.
– Fitxatu nahi dituzten txirrindularien artean Chris Horner Espainiako Itzuliaren irabazlea eta Alberto Contador daude, bigarren hau 2015ean.
– Babesleetako bat FIAT izan daiteke, eta Vodafone bestea. Litekeena da bizikletak Cerveló markakoak izatea. El Periódico-ren arabera etxe horrek 2,5 milioi euro eskaini dizkio Alonsori, talde berriko txirrindulariek bere bizikletak erabili ditzaten.
– Proiektu berriak 6 milioi euroko aurrekontua izango du gutxienez.
Gauzak zertan geratuko diren ziur esaterik ez dago oraindik, baina badirudi gaur egungo egitura hasiera batean uste baino lehenago desegingo dela. Egoitz Lizasok Tropela.net-en dioen moduan, urria amaitzerako Alonsok taldea prest izan beharko du –UCIren aurrean proiektua aurkezteko–. Ordura arte itxarongo dugu proiektuaren izaeraz ofizialki hitz egiteko.
Iruzkinik ez
Trackbacks/Pingbacks