Euskaltel-Alonso: Desengainua

Atalak: Txirrindularitza

Agur Euskaltelen eta Alonsoren arteko akordioari.

Akabo. Euskaltel-Euskadiren eta Fernando Alonsoren aurre-akordioa behin betiko hautsi da. Bi aldeak gogotik saiatu omen dira adostasunera heltzen, baina ezin izan dute aurrera egin. Proiektuak hasieratik zituen argi-ilunak, baina inork gutxik espero zuen gauzak horrela amaituko zirenik…

Euskaltel-Euskadi: “Euskaltelen ordezkariak desengainatuta daude negoziazio-prozesuak izan duen bukaeragatik. Albiste tristea da Euskaltelentzat eta taldearentzat (…) Euskaltelek ahalegin handia egin du aldeak ados jartzeko, eta dena eman du, inolako mugarik jarri gabe (ez ekonomikorik, ez bestelakorik), hedabide batzuek besterik adierazi badute ere”. (Komunikatua osorik, euskaraz)

Fernando Alonso: “Amaiera arte ahalegindu gara, baina ezinezkoa gertatu da 2014an txirrindulari taldea izatea. (…) Bihartik lanean hasiko gara harro sentiaraziko gaituen taldea osatzeko, beharrezkoa balitz hutsetik abiatuta, kirol honekiko errespetutik eta umiltasunez. Txirrindularitza maite dut. (…) Ilusioz begiratzen diogu  2015ari”. (Komunikatua osorik, gaztelaniaz)

Kiko Garcia (talde berriak izan behar zuen/izango duen manager nagusia): “Lehen minututik jarri dizkigute oztopoak, ongietorria emango zigutela eta ateak zabalik izango genituela pentsatzen genuenean. Kirol hau 30 urtean ez da aldatu. Ez dira gai kanpotik iristen diren gauza berriak asimilatzeko. Ideia berritzaileak eta kaudimen ekonomikoa izan arren, arerio gisa ikusi gaituzte batzuek”. (Adierazpenak osorik, gaztelaniaz)

Igor Anton (Euskaltel-Euskadiko txirrindularia): “Salduta sentitzen gara; ez soilik txirrindulariak, baita gainerako langileak ere. Proiektuan lau urte jarraitzeko ilusioa genuen, eta bakarra ere ez dugu eman. Ez digute ezertxo ere komunikatu. Abandonatu egin gaituztela sentitzen dugu. Hutsaren hurrengoak garela dirudi”. (Adierazpenak osorik, gaztelaniaz)

Arrazoi du Antonek. Parterik txarrena kontratua indarrean zeukaten hamalau txirrindulariek eta gainerako langileek eraman dute, etorkizun hurbila zalantzaz josia dagoelako. Azalpen bat merezi dute, bereziki haiek guztiek, baita zaletuek ere.

Euskaltel-Euskadi: “Gustatuko litzaiguke negoziazioen xehetasunak azaltzea, guk dena eman baitugu, zintzotasun osoz, baina ezin dugu halakorik egin, negoziazioen konfidentzialtasuna errespetatu egin behar baita”.

Informazio gehiago:

Hautsi egin da Euskaltel-Alonso akordioa (Unai Zubeldiak Berrian)

Euskaltel ezer gabe geratu da (Egoitz Lizasok Tropela.net-en)