Osasuna eta Athletic, ustezko irregulartasun fiskalengatik jopuntuan

Atalak: Futbola

[Eguneraketa, 2013-12-18]

Joaquin Almunia Europako Lehia komisarioak jakinarazi duenez, Europako Batzordeak ez du San Mames Barria ikertuko. Bai, ordea, Osasunak, Athleticek, Real Madrilek eta Bartzelonak elkarte anonimo ez izateagatik dauzkaten “onura fiskalak”. Gainerako taldeei %30 aplikatzen zaien bitartean, aipatu lau taldeei %25 aplikatzen zaie.

Iturriak: Naiz / Berria  / Deia

San Mames Barria elkarteak jaso dituen laguntza publikoak ikertuko ditu Europak. (Argazkia: Miathletic.com)

Europak espedientea ireki du Athletic eta Osasuna futbol taldeen aurka, legez kanpoko diru laguntzak jaso ote dituzten argitzeko. Batetik, elkarte anonimo bilakatu ez direlako ikertuko dituzte, horrek abantaila fiskalak (zergak direla-eta) eman dizkielakoan. Eta bestetik, Athleticen kasuan zehazki, San Mames berriak jaso dituen diru-laguntza publikoak jarri ditu jomugan Europako Batzordeak (EB).

Athletic eta Osasuna dira, Bartzelona eta Real Madrilekin batera, elkarte anonimo bihurtu ez diren lehenengo mailako futbol talde bakarrak. Bi erraldoien jarduna ere ikertuko du Europak; baita Valentzia, Elx eta Hercules taldeena ere, hiru horiena beste arrazoi batzuengatik: 2011n Valentziako Generalitateak 118 milioi euroko abalak eman zizkien herrialdeko ekipoei; bakarrak ere ez zuen bere zorra ordaindu, eta Autonomia Erkidegoak bere gain hartu behar izan zituen kostuak, diru-kutxa publikoen kalterako.

Zergatik itxaron du Europak 20 urtez?

1990eko lege batek, elkarte anonimo bilakatu behar izatetik salbuetsi zituen Osasuna, Athletic, Real Madril eta Bartzelona. EBren ustez, zerga sistemari dagokienean abantaila eman die horrek, baita irabazi asmorik gabeko erakundeen estatusa ere. Orduan zergatik itxaron du 20 urtez? 2009ra arte inor ez zelako kexatu, Luis Doncel eta Eduardo Ortega kazetariek El País eta Público egunkarietan nabarmendu duten moduan.

Zer esango du Almunia zuri-gorriak?

“Gobernuak amaiera arte egingo du borroka Espainiako futbol taldeen alde”, adierazi du Atzerri ministro Garcia Margallok: “Haiek ere España markaren parte dira”. Espainiako Gobernuak hilabeteko epea du Europaren susmoak uxatuko dituen txostena prestatzeko. Ikusteke dago Joaquin Almunia EBko Lehiakortasun komisario eta Athleticeko bazkidea konbentzituko ote duten txostenean jasotakoek. Hala ez bada, futbol taldeek legez kanpoko laguntzak itzuli beharko dituzte.

Futbol Liga Profesionalak (LFP) prentsa-oharra (pdf) plazaratu du. Babes “osoa” azaldu die haren ustez “legearen baitan” jokatu duten futbol taldeei.

San Mames Barria

Bilbotarrei dagokienean, futbol zelai berria eraiki duen San Mames Barria elkarte publikoak jasotako laguntzak ere ikertuko ditu Europak. Athleticek, Bizkaiko Diputazioak, Eusko Jaurlaritzak, Bilboko Udalak eta Kutxabankek 218 milioi euro jarri zituzten orotara, Berriak dioenez: Jaurlaritzak, Aldundiak eta Kutxabankek bakoitzak 55 milioi euro; Athleticek 42 milioi eta Udalak 11 milioi.

Athleticeko presidente Josu Urrutiak prentsaurrekoa eman du gaur: “Athleticek legea bete du historikoki, eta gaur egun ere hala egiten du. Klubak bazkideena izan jarrai dezan borrokatuko dugu”.

Prentsaurrekoaz Deian eta Berrian.

Bestalde, Osasunako presidente Miguel Archancok adierazi du kalapita honek guztiak ez duela esan nahi taldea elkarte anonimo bilakatu beharko denik.