Dakar rallyak Txileko ondare arkeologikoa suntsitu duela salatu dute

Atalak: Kirola, Nazioartea

Txileko Estatua ondare geografikoa suntsitzearen “konplize” dela diote arkeologoek. Argazkia aurtengo ediziokoa da, Argentinako etapa batean aterea. batean.

Dakar rallyak “kalte handiak” eragin ditu Txile iparraldean, Arkeologoen Kolegioak salatu duenez. Estatua”konplize” dela dio, eta eskatu dio uko egin diezaiola lasterketa bere lurretan egiteari, Ekuadorrek egin duen bezala.

Dokumentaturik dauden 250 gune kaltetu ditu moto, auto eta kamioien lasterketak, Paola Gonzalez arkeologoak azaldu duenez, lurrean harriz egindako geoglifo ugari tartean, baita Inka Bideko guneak ere. “Milaka historia liburu suntsituko balituzte bezala da”, kexu da Gonzalez. “Ezin dira berreraiki, ez dira berriztagarriak. Geoglifo bat ez da kanelondo baso bat bezalakoa, suntsituz gero alboko muinoan beste bat landa dezakezuna. Gune arkeologikoa suntsituz gero, ez duzu sekula gehiago jakingo bertan zer gertatu den, eta ez duzu ikerketekin jarraitzerik izango”.

Urtarrilaren 5ean abiatu zen Dakar rallya Argentinako Rosario probintziatik, eta 18an amaituko da Txileko Valparaison, Bolivia zeharkatu ostean. Hain justu, Valparaisoko portuko langileek ere errekurtsoa jarri zuten rallya UNESCOk babestutako hirigune historikoan sar ez zedin, ondareari eraso egiten diolakoan.

Datorren urtean Ekuadorretik pasatzea zen Amaury Sport Organisation (ASO) enpresaren asmoa, baina Gobernuak uko egin dio proposamenari, 9 milioi dolarreko inbertsio publikoa eskatzen duelako, enpresa pribatu baten mesederako. Gainera, ingurumen eta arkeologia auziei dagokienez, Gobernuak dio ASOk ez duela inolako proposamen-neurririk jasotzen. Halaber, kirol honek ez omen du zale askorik Ekuadorren.