Eskubaloi jokalariak, top eta kulerotxoak janztera behartuak

Atalak: Kirola

[Eguneraketa: 2014-07-11]

Kirol Kontseilu Gorenak ebatzi du neskek edozein janzkera erabili dezaketela, neurria sexistatzat jo duten jokalarien aldarrikapenei erantzunez.

Jokalariek nahi duten janzkera aukeratu ahal izango dute Estatuko txapelketetan lehiatzeko. Handik kanpo jokatu behar dutenean, aldiz, nazioarteko araudiari men egin beharko diote: sabela bistan eraman beharko dute eta azpialdeko bikiniak, alderik zabalenean, ez ditu hamar zentimetro baino gehiago izango. Aitzitik, gizonezkoek galtza zabalak jantzi ditzakete, belaunetik behera gehienez hamar zentimetro luze izan daitezkeenak.

[Jatorrizko artikulua, 2014-07-08]

Europako –eta Espainiako– eskubaloi federazioaren arabera, ezkerreko neskak behar bezala jantzita daude. Ez, ordea, eskuinekoak. (Argazkia: @progresos_bm)

Espainiako eskubaloi federazioak kargu hartu die asteburuan Suances (Kantabria) hiriko hondartzan jokatutako txapelketan aritu diren nesken 21 talderi. Zergatik eta top eta bikiniarekin ez jokatzeagatik, Europako araudiak zehazten duen moduan.

Kirol uniforme desegokia janzteagatik eskubaloi taldeek jasotako oharra.

Gertatutakoak haserrea piztu du neurria sexistatzat jo duten jokalari eta zale ugariren artean, baita euskal federazioan ere. Federaziotik jakinarazi dute aztertu egingo dutela datorren urtean Espainiako federazioak antolatutako txapelketetan parte hartzen jarraituko duten ala ez. Bien bitartean gainerako erkidegoetako federazioekin harremanetan jarriko direla azaldu dute, ahalik eta babes handiena bildu eta Espainiako federazioarekin akordioa lortu aldera.

Datorren urtean jarriko da indarrean Europako araudia: Neskek top eta bikiniarekin jokatu beharko dute; bestela kanporatuak izango dira.

“Ganadua bezala tratatzen gaituzte”

Kantabriako txapelketan aritu den Maria Ballester jokalariaren hitzetan, egiteko gai direna erakutsi nahi dute joko-eremuan, eta hain justu hori ikustera doa jendea hondartzara. “Bost axola du ederrago jantzita goazen ala ez”, adierazi du SER irratiak egindako elkarrizketan. “Oparituta ere ez genituzke arropa horiek jantziko. Lege berria onartezin eta arkaikoa da”, dio.

“Emakume bezala, ganadua bezala tratatzen gaituztela sentitzen dut”, gehitu du 1997az geroztik hondartza eskubaloian ari den Loreto Ochando i Muriel jokalariak. Espainiako federazioari zuzendu zaio: “Zergatik jokatu behar dut kulerotxoekin? Zergatik behartzen naute modu zehatz batean janztera, nahi dudana eskubaloian aritzea bada?”. Federazioko presidenteari dei egin dio emakumezko kirolariekin bil dadin araudi “misogino eta matxista” horri buruz hitz egiteko. “Badirudi ez dugula ez boz ez botorik”.

 “Janzkera hori bat dator jokatzen den tokiarekin”

Ez dirudi, ordea, Espainiako eskubaloi federazioko presidente Francisco Blazquez jokalarien eskaerei men egiteko aldarte egokienean dagoenik. Top eta bikinien inposizioa babesteko, jokatzen den tokiarekin “bat datorren” janzkera dela adierazi du: “Ohikoena da jendea hondartzara top eta bainujantziarekin joatea. Ez da sexismo kontua, baizik eta erosotasunari, estetikari eta lekura egokitzeko gaitasunari dagokion zerbait”.

“Joka dezala berak tangarekin, zein erosoa den ikusiko du!”, erantzun diote jokalari ugarik sare sozialen bidez.

Emakunde, arauaren aurka

Emakundek oharra plazaratu du (pdf) auziaren inguruan. Erabaki “sexista” dela uste du eta ez duela zerikusirik jokalekuetan besteen gainetik gailendu behar diren kirol baloreekin.

Jokalarien aldeko txosten bat egingo du eta bat egiten du Europar Batzordean neurriaren kontra aurkeztutako ekimenarekin.

Jokalarien erreakzioak Twitterren

En los años 20 nos medían el largo del bañador y en el 2014 nos obligan a jugar Bm playa en Top/braga.… http://t.co/NJ24iCQcCq

— Eli Pinedo (@EliPinedo) July 8, 2014

El Balonmano Playa FEMENINO no es una exhibición para valorar y mostrar los cuerpos, sino, nuestro deporte. #TRUFIS

— Las Trufis BMPlaya (@BMPLasTrufis) July 8, 2014

A veces es difícil congregar a equipos femeninos en torneos de bm playa..Ahora sancionan por jugar en bikini? Estamos locos? Déjennos jugar

— Irene Garcia Martos (@MartosIrene) July 8, 2014

Da igual con qué juguemos, es un deporte no un desfile de modelos.Nosotras jugamos, nosotras decidimos #ponteeltopTU pic.twitter.com/vweaD1VwpU

— Progresos Balonmno (@progresos_bm) July 8, 2014

Me parecen perfectas las dos opciones, NOSOTRAS JUGAMOS NOSOTRAS DECIDIMOS #ponteeltoptu RT pic.twitter.com/nnpkcyP8eG

— Progresos Balonmno (@progresos_bm) July 8, 2014