Donostia Cup jokatu duten ume palestinarren adiskide bat hil dute israeldar bonbek

Atalak: Futbola, Palestina

[Zuzenketa: 2014-07-16]

Gertatutakoaren larritasuna ezbaian jarri gabe, albistea zuzendu beharrean gara. Israeldarrek ez dute Muslin –Hai Al Bustan taldeko kidea– hil, jokalarien adiskide Mohamed –eta haren familia– baizik, Garako kazetari Oihane Larretxeak ohartarazi digun moduan. Taldeko kideek oso gertuko zuten Mohamed, eta hori izan da okerreko informazio zabaltzearen arrazoia.

Garak dioenez, Palestinara itzuli diren gazte guztiak haien etxeetan daude, Gazan, baina Israelek iragarri du etxeak bota eta kolonoentzako lorategiak paratuko dituztela bertan.

[Jatorrizko artikulua: 2014-07-15]

Donostia Cup jokatu behar zuen ume palestinar bat hil dute israeldar bonbek

Jerusalemeko Silwan auzoko ume palestinarrek osatzen duten futbol taldea da Hai Al Bustan. Donostia Cup txapelketa jokatzera etorri ziren pasa den astean Euskal Herrira. Hemen zeudela, baina, Israelen bonbek bete-betean harrapatu zituzten: Hegazkin israeldar batek jaurtitako misilak haien taldekide bat hil zuen Gazan. Traba burokratikoak medio, mutikoak ez zuen Donostiara bidaiatzerik izan…

Gertatutakoaren berri izan ostean Hai al Bustan taldeko kide guztiak Palestinara itzuli ziren, Gipuzkoako erakundeen desioa zen arren egoera baretu arte asilo politikoa ematea.

Palestinako ume hauek astebete eman dute Donostian. Oxigenoa. Ez zutela etxeratu nahi onartu zuten. Amesgaiztoa. pic.twitter.com/S8nTIhq2Xh

— Oihane Larretxea (@GARA_olarretxea) July 13, 2014

Israelen erasoa salatu dute Gipuzkoako Batzar Nagusiek aho batez

Gipuzkoako Batzar Nagusiek adierazpen instituzionala adostu dute gaur, asteartea, aho batez, “gogor salatuz Donosti Cup-era etorri den palestinar haurren taldeko kide bat hil dutela bonbardaketa batean bere sendiarekin batera, Donostiara etortzeko handik ateratzea galarazi eta gero”. Adierazpenean eskatzen zaio Israeli eten dezala palestinar herriaren aurka une honetan ematen ari den erasoa eta nazioarteari, aldiz, eraso hori amaitu dadin presioa egin dezala.

EH Bildu, EAJ, PSE eta PPko batzarkideek egin dute bat Adierazpenarekin.

Auzotik botako dituzte

Kolono israeldarrak Silwan inguruko lurren jabe egin direla-eta, aurki auzotik alde egin beharko dute gazte palestinarrek. Gipuzkoako Batzar Nagusiek nabarmendu duten moduan, “pobrezian murgildutako haurrak dira gehienak, umezurtzak eta behin baino gehiagotan poliziaren ziegetatik pasatu behar izan direnak, horrek suposatzen duen tratu txar, bortizkeria eta ezintasun guztiarekin”.

Hai Al Bustan taldeak ez du futbola soilik jorratzen; dantza taldea ere badute, 4 eta 14 urte bitarteko ume eta gazteen udalekuak antolatzen dituzte, baita emakumeen formazio saioak ere. Donostian egindako ongi-etorri ekitaldian haien ahotsa aintzat hartzeak duen garrantziaz aritu ziren: “Herri honi kasu egitea eskatzen dizuegu laguntza behar duelako, ulermen asko behar duelako, baina batez ere Herri gisa aitortua izan dadila behar duelako. Eskerrik asko gure hitzok entzuteagatik”.

Batzar Nagusietako jarduneko lehendakari Julio Astudillok “elkartasun, babes eta maitasunik beroena” helarazi zien batzarkide guztien izenean: “Badakigu zuen bizimodua ez dela batere erraza, eta zuen herria injustuki sufritzen ari dela”.

“Palestina askatu!” manifestazioak Euskal Herrian

Datozen egunetan manifestazioak izango dira Euskal Herrian, palestinar herriarekiko elkartasunez.

Jada zehaztutako hitzorduak, Askapenaren webgunean bilduak:

Uztailak 15

Billabona: 20:00etan elkarretaratzea Berdura plazan.

Uztailak 16

Gasteiz: 18:30ean elkarretaratzea Andra Mari Zurian. Ondoren kalejira Mendizorrotzaraino (Noa israeldarrak kontzertua emango du).

Uztailak 17

Bilbo: 19:00etan manifestazioa Arriagatik.

Iruñea: 19:00etan manifestazioa autobus geltokitik.

Donostia: elkarretaratzea (ordua eta lekua zehazteko).

Tolosa: 19:00etan manifestazioa Triangulotik abiatuta.

Uztailak 18

Baiona: 18:00etan elkarretaratzea Herriko Etxe aitzinean.

Laudio: 19:00etan elkarretaratzea Lamuza plazan.

Uztailak 20

Iturmendi (Sakana): 20.30ean elkarretaratzea Herriko enparantzan.

Israelen aurkako ekintza Basaurin

Hainbat lagunek Basauriko Carrefour saltokiaren aurrealdea margotu dute astelehenean, palestinar herriaren aurkako sarraskia salatu eta Carrefour “genozidioaren konplize” dela gogorarazteko.