Independentista galiziarrak Espainiako Vueltaren aurka… eta euskal herritarrak?
Abian den Espainiako txirrindulari itzuliak, Vueltak, Galiziako lurretan emango ditu azken egunak, irailaren 10etik 14ra bitartean. Beste edizio batzuetan gertatu den moduan, izan Galizian zein Euskal Herrian edota Katalunian, kolektibo independentistek protestara deitu dituzte herritarrak.
CIG taldeko militanteek iaz Vigon paratutako bandera. (Argazkia: Diario Liberdade)
Lasterketari boikota egitea proposatu duen erakundeetako bat Causa Galiza da. Salatu duenez, Xuntak, oinarrizko kirola ekonomikoki itotzen diharduenean, 290.00 euro xahutu ditu Vueltan “Galiziaren irudia promozionatzeko”. Halaber, “espainiartasuna” goresten dela dio, Galiziako selekzioari ateak ixten dizkioten bitartean.
“Vueltaren presentzia probokazio hutsa da, gure izaera nazionala ukatu, bere marko politikoa inposatu eta gure eskubide politikoak urratzen dituen Estatuak egindako probokazioa, zeinak bere hizkuntza eta kultura inposatu nahi dizkigun”, adierazi du Causa Galizak. “Baldintza horietan, itzuliak Galizia normaltasunez ez zeharkatzea lortu behar da, baita nazioarteari aldarrikapen independentisten berri ematea ere”.
Erakundeak herritarrei dei egin die galiziar banderak erakusteko, eta Udalei itzuliaren aurkako mozioak aurkezteko.
Aurreko edizioetan, NOS-UP, AMI eta CIG bezalako erakundeek ere bat egin dute mobilizazioekin.
Euskal Herrian, beste batzuetan baino epelago?
Galizian sartu aitzin, irailaren 3an, Espainiako itzuliko etapa Iruñean hasi eta Aralarko San Miguelen amaituko da. ESAIT Euskal Selekzioen Aldeko Iritzi Taldeak aldarrikapenerako baliatu nahi du eguna, eta lasterketa ikustera hurbiltzen direnei dei egin die euskal sinboloak (ikurrinak, banderolak… ) hartuta bertaratzeko.
Eskaera bera egin diete EH Bildu koalizioko ordezkariek, Nafarroak bere “ikur, kultura eta hizkuntza” erakutsi ditzala. Halaber, Unipublic enpresa antolatzaileari eskatu diote errealitate linguistikoa errespeta dezala, megafonia-emisioetan eta publizitate euskarrietan euskarari tarte bat egiteko.
Blog honen irakurle zorrotzenek badakite zenbait kirol ekitaldi saboteatzeko deien aurrean epel/kritiko samar agertzen naizela, norberak barrenetik ateratzen zaiona egiteko eskubide osoa duen arren –mugak muga–. Bada, zentzu horretan, harriturik nago Nafarroan egingo den etapak gurean zein zalaparta gutxi eragin duen ikusita. Ia astebete falta da oraindik, baina…
Badaki inork protestarik deituta dagoen?
Tour de France ospatzen denean, askotan beste herrialdetik igarotzen dira , ba imagina ezazu gauza bera gertatuko dela hemen je je eta kontzientzia garbituta izango duzu inondik ere ezer ez egiteagatik. Zintzo ibili.