Emakume boxeolariak, historia apur bat

Atalak: Boxeoa, Gizartea

Erreferentzia interesgarriak eman ditu Javier Lezaolak Pikara aldizkarian plazaratutako Las leonas del ring (Ringeko lehoiak) erreportajean, boxeoan ari diren hiru emakume espainiarren –Marian Martinezen eta Ariadna eta Fatima Martin ahizpen– esperientzietatik abiatuta.

[Argazkiak: Joaquín Gómez Sastre]

Fatima Martin, Elxeko entrenamendu gunean.

Protagonista izan eta diren izenak bildu ditu Lezaolak, besteren artean, AEBetan 1970eko hamarkada amaiera eta 90eko hasiera bitartean oztopoak gainditzeko borroka egin zuten Jackie Tonawanda, Gail Grandchamp, Cathy Davis eta Marian Trimiar; 1993an sexu diskriminazioagatik epaiketa bat irabazi zuen Dallas Malloy; eta 1996an Mike Tyson eta Frank Bruno mitikoen aurretik borroka egin zuten Christy Martin eta Deirdre Gogarty [bideoa].

Fatima Martinen ukabilak.

Haiek eta beste hainbat emakumek urratutako bideari esker nesken boxeoak geroz eta sona handiagoa du, bereziki 2012an kirol olinpikoen zerrenda ofizialean sartu zenetik, Mexikon egin berri den Emakumezko Boxeoaren I. Gailurrak erakusten duen moduan.

Film eta dokumental batzuek ere lagundu dute horretan: Million dollar baby (2004), Licencia número uno (2008), La boxeadora (2008) edota A golpes (2005).

Marian Martínez eta Fátima Martín, entrenamendu batean.

Parekidetasunaz

Amateur mailan paretsuak dira gizon eta emakume boxeolarien irabaziak (60 euro inguru borroka bakoitzagatik). Ez, ordea, profesionaletan. Beste kiroletan bezala, soldata askoz ere altuagoak dituzte gizonezkoek.

Artikuluari erantzun dion erabiltzaile batek dioen moduan, dena den, alferrikakoa da soldata parekideak eskatzea, emakumezkoen boxeoak (kirolak oro har) diru askoz ere gutxiago sortzen-mugitzen duelako, interes gutxiago pizten duen heinean. Zentzu horretan egin beharko litzateke lan lehendabizi: emakumezkoen boxeoa (kirola) babestu eta zaleak erakarri. Eta horretarako, amateur mailara heldu aurretik egin behar da lan, sarri nabarmendu dugun bezala: aisialdi taldeetan, eskoletan, kirol elkarteetan… profesionaletara iristea (goi mailako konpetizioa) helburu nagusi izan gabe, baina profesionaletara iristeko edo iritsi osteko baldintzen duintasuna bermatuz.

Ez nator bat, bestalde, bigarren erabiltzaileak esandakoarekin. Emakumezkoen eta gizonezkoen artean alderik ez dagoela dio, zakila edo bagina izatetik harago. Zakil eta bagina horiek dauden lekura iristeko zenbat lan egin behar izan duten ahaztu zaio. Sustraietara jotzea ahaztu zaio, zakil eta bagina horiek zein posiziotik hasi diren kontuan hartzea.

Beste post batean hitz egingo dugu horri buruz…