Ikur nazirik ez erakusteko eskatzea oraindik beharrezkoa denean

Atalak: Futbola

Real Madril eta Bartzelonak elkarren aurka jokatuko dute larunbatean Bernabeu futbol zelaian. Mundu osoa hara begira izango delako edo auskalo zergatik, Madrileko zuzendaritzak komunikatua (PDF) plazaratu du: zaleei eskatu die ikur eta bandera nazirik ez eramateko. Gogorarazi die Espainiako Estatuko eta nazioarteko hainbat erakundek ikur horiek erakustea zigortzen dutela. Agindua betetzen ez dutenei diziplinazko espedientea irekiko zaie.

Alegia, gaur egungo Espainian halako oharrak plazaratzea oraindik beharrezkoa dela. Eta beharrezkoa da, besteren artean, polizia eta epaileak ez direlako nahikoa gogor ari.

Real Madrileko zuzendaritzak zabaldu dituen irudietako batzuk.

Pasa den maiatzean, UEFAk talde zuria zigortu zuen, Municheko Bayerren aurkako partidan zale batzuek bandera naziak erakutsi zituztelako.

Bitxia da, bestalde, Interneteko foroetan Real Madrileko zale batzuek diotena. “Gure taldea urratsak ematen ari da; ez ordea Bartzelona, ikur eta oihu antikonstituzionalak –esteladak eta aldarrikapen independentistak– onartzen dituena”. Alegia, independentzia eskatzea nazia dela ia-ia. Edo “ia-ia” gabe.