Rayo-Eibar: Futbol modernoa jo-puntuan, harmailak Simpsondarren egongela bihurtuak

Atalak: Futbola

Ez da lehendabiziko aldia. Rayo Vallecano futbol taldeko zaleek ate atzeko harmaila hutsik laga zuten atzo, Eibarren aurkako partidan, negozioa ardatz duen futbol modernoaren aurka protesta egiteko. Zale euskaldunek ere bat egin zuten protestarekin, partidak astelehenetan jokatzearekin ados ez daudela adierazteko: “Izan asiar merkatua edo nahikoa kate ez dituen telebista operadorea asetzeko, zaleei –astean zehar harmailak erdi hutsik egoten dira– zein futbolari berari kalte egiten dioten erabakiak hartzen dira. Bien bitartean, inork ez du ahotsik altxatzen”, dio bi taldeetako zaleek plazaratutako oharrak.

Tira, ate atzeko harmaila huts hutsik ere ez zegoen. Simpondarrek euren egongela bilakatu zituzten aulki hutsak. Tarteka, marrazki bizidunetako pertsonaiek ordutegi duinen aldeko eta “futbol negozioaren” aurkako leloak erakutsi zituzten.

“Azken ordukoa Vallecanfieldetik. Futbol-negozioaren aurkako protesta berria” (Kent Brockman)

“Telebista eskubide gehiago, diru gehiago gure poltsikoetara. Zoragarri” (Mr. Burns)

“Futbol modernoa, biderka zaitez zerogatik!” (Bart Simpson)

“Inork ez al du umeengan pentsatzen?” (Helen Lovejoy)

[Milesker erreferentziagatik, McArra]