Kontxan futbolean: Francoren yateak ez zuen Bilduk adina enbarazurik egiten

Atalak: Futbola

Onartu behar da Franco eta Bildu modu oso profesionalean lotu dituela El Confidencial agerkariko lerroburuak: “La Concha: del yate de Franco a la comuna del fútbol playero impuesta por Bildu” (Kontxa: Francoren yatetik Bilduk inposaturiko hondartza-futbolaren komunara).

Badaezpada ere, gauzak nahikoa argi geratu ez badira-edo, azalpena: “71 urteren ondoren, Gipuzkoako Futbol Federazioak uko egin dio Kontxako eskolarteko futbol txapelketa antolatzeari. Txapelketa berezi eta historiko honek, Realeko jokalari asko eman dituenak, Arconada edo Xabi Alonso esaterako, utzi egin dio lehengoa izateari, politikarien esku hartze eta inposizioagatik”.

Bilduri buruzko ohiko diskurtsotik haratago, eskola kirolak beharko lukeen funtzio hezitzailearen gainean Enrique Marín kazetariak agertzen duen axolagabekeria nabarmenduko nuke bereziki.

Lehendabizikoz ari dira nesken taldeak Kontxan. Egutegi-jokalekuak moldatzeak ez ditu guztiak ase… (Argazkia: Donostia Kirola)

– Lehen aldiz, nesken taldeek ere jokatzeko aukera izango dute. Guraso talde baten eskariari erantzunez, eta Arartekoarekin eta eskolekin gaiaz hausnartu ostean [halakorik ez du aipatzen El Confidencialek], Donostia Kirolak –Udalak– neurri hori hartzea erabaki du, “sexuaren araberako diskriminazioa saihesteko eta nesken kirolari presentzia publiko handiagoa emateko”. Nesken parte-hartzeak, talde askoz ere gehiago egoteak, ekarri du txapelketaren egutegi eta eszenatokia egokitu beharra –partida asko belar artifizialeko zelaietan jokatuko dira–, eta horrek eraman du Federazioa antolaketari uko egitera.

El Confidencial-eko kazetariaren jokaldiak, Federazioak talde mistoak jada onartzen zituela eta hark abian jarritako emakumezkoen lehiaketa batean soilik bi taldek izena eman zutela nabarmentzeak, Kontxako txapelketan nesken 26 talde ariko direla aipatu ere egin gabe, erabat desbirtuatzen du errealitatea; eta egoeraren zio edo erantzuleak nahasten ditu, emakumezkoen presentzia geroz eta handiagoagatik kexu diren Internauten iruzkinek agerian jartzen duten moduan.

– Aurtengo denboraldian ez da finalik egongo, “konpetizioa” baino, “formazioa” sustatzea baitu helburu Udalak.

Kazetariaren hitzetan gauza “oso larria” da hori, “garaile eta garaiturik ez egotea” alegia, edozein kirol konpetizioren “antitesia” delako. Eskola kirola vs kirol federatua… oreka topatzea ez da ez ahuntzaren gauerdiko eztula. Luis Mari Zulaika Isastik, Gorputz Hezkuntzako irakasle eta eskola kirolean adituak, hala esan zuen kirol amateurrari buruzko Larrun aldizkarian: “Eskola-kirolarekin zer gertatu da? Errendimenduaren aldeko kolektiboek (kirol elkarte, federazio eta komunikabide potente batzuk) indar izugarria dutela eta erabakiak hartu beharko lituzketenek amore ematen dutela presio horren menpe”. Badirudi, kasu honetan behintzat, beste agente batzuek adorea izan dutela aurrera egiteko.

– Donostia Kirolak azaldu du mutil zein neskentzako berdintasunezko lehiaketa lortzeaz gain, beste zenbait kirolen eskaerei ere erantzuna emango zaiela (belar hockey edo eskubaloiari, adibidez), egutegien antolaketa berriak futbol-8 eta alebinek egiten duten bigarren kirolarekin koordinazioa erraztuko duelako. Hau da, multikirola bultzatu nahi da.

Federazioko ordezkari Juan Luis Larrearen hitzak bere eginez, El Confidencialek dio hondartza-futbolaren arabera osa beharko litzatekeela eskola kirolaren egutegia, itsasaldiek baldintzatzen duten heinean. Futbolaren nagusitasuna justifikatzeko aitzakia gisa balio dezake, baina kirol aniztasunak 71 urteko tradizioa moldatzea eskatzen badu, horretarako pausoak eman behar dira.

[Milesker El Confidencialeko artikuluaren erreferentziagatik, Euskarabajo]

Informazio gehiago:

Neskek hondartzako futbol txapelketan parte hartu dute lehen aldiz (Irutxuloko Hitza)

Neskek Kontxako hondartza konkistatu dute (Público)

Kontxako txapelketan, hondartza gutxiago eta finalik ez. (Diario Vasco)