Zorra kitatzeko ondasun guztiak eman ditu Osasunak

Atalak: Futbola

Askoren iritziz, Osasuna futbol taldeak sekula hartu duen erabakirik garrantzitsuena da hau: Foru Ogasunarekin pilatu duen zorraren parte bat kitatzeko –53 milioi eurotik 43–, Sadar estadioa eta Taxoareko instalazioak Nafarroako Gobernuari eman dizkio.

Krisi larria bizi du Osasunak. Aipatu 53 milioi euroko zuloaz gain, 22 milioi zor dizkie banku eta hartzekodunei : 75 milioi euro orotara.

Baldintzak

Nafarroako Gobernuak doan lagako dio Sadar futbol zelaia Osasunari, eta Taxoareko instalazioei dagokienez alokairu-kontratua izenpetuko dute.

Bestalde, telebista eskubideen eta jokalari salmentaren %25 zorra kitatzera bideratuko du Osasunak, baita babesletza publikoaren %100 ere.

Estatu laguntza al da?

Kudeaketa batzordeak egindako proposamenaren alde azaldu dira bozketan parte hartu duten 188 bazkide konpromisarioetako 160; 6 lagunek aurka bozkatu dute eta 20 abstenitu egin dira. Jokoan zegoena aintzat hartuta, bazkide kopuru “irrigarriak” hartu du parte bozketan, Javier Saldise eta Mikel Saiz kazetariek Diario de Noticias egunkarian nabarmendu duten moduan.

Parlamentuan gehiengoa osatzen duten UPN, PSN eta PP alderdiak erabakiaren alde azaldu dira. Geroa Bai koalizioko Uxue Barkos diputatuaren hitzetan, ordea, litekeena da Europar Batasunaren irizpideak urratu izana, “Estatuaren laguntza” kontsidera lezakeelako. Hain justu, azken denboraldietan Osasuna bera, Athletic, Bartzelona eta Real Madril taldeak UEFAren begira-puntuan izan dira, ustez Estatuaren laguntza ekonomikoa jasotzeagatik. Zentzu horretan, Pedro Pegenaute konpromisarioak adierazi du Eusko Jaurlaritzak “bost izarreko estadioa” eraiki diola zergadunen diruarekin Athletic taldeari, eta “inork ere” ez duela deus esan. Hainbat alderdi politikok Osasuna “diskriminatu” dutela gaineratu du, Navarra Deportiva agerkariak jaso duenez.

Parentesi moduan, esan Herbehereetako hainbat udal ikertzen ari direla futbol taldeei abantailazko laguntzak emateagatik, eta talde belgikar zenbait ere susmopean daudela.

Nafarroako Parlamentuak azaroaren 27an erabakiko du bazkideek egindako proposamena onartu ala ez. Egun horretan bozkatuko dute ere Geroa Baik aurkeztutako lege-proposamenaren gainean.

Informazio gehiago:

Parlamentua, zatituta (EFE)

Blogean futbolaz:

San Mames Barriak diru publikoa jaso badu, guk zergatik ez? (2014-04-09)

Osasuna eta Athletic, ustezko irregulartasun fiskalengatik jopuntuan (2013-12-17)