Anoeta eraberritzeko obrak: datuak

Atalak: Futbola

Anoetako estadioa, atletismo pistarik gabe.

Berrikuntzak

Donostiako Anoetako estadio eraberrituak ez du atletismo pistarik izango, eta orotara 40.000-45.000 ikusle hartu ahal izango ditu –gaur egun 32.076 eserleku ditu–.

Estalkia berritu eta estadio inguruko kaleetan hobekuntzak egingo dira.

Miniestadioan 800 eserleku gehiago jarriko dituzte –1.200 ditu gaur egun–. Kopuru hori handitzerik legoke 3.000 eserleku desmuntagarriri esker. Halaber, teilatua eta bestelako azpiegiturak (aldagelak, aurkezpen aretoa…) berrituko dituzte. Helburua da nazioarte mailako atletismo probak jasotzeko baldintza egokiak izatea.

Epeak

Litekeena da Anoetako obrak 2016ra arte ez hastea, tramite urbanistikoak gora-behera, Donostiako Udalak aditzera eman duenez. Eraberritze lanak lau urtez luza litezke.

Miniestadioko obrek bi urte inguru iraungo dute.

Kostua

Aurreikusitakoaren arabera, eraberritzeak 45 milioi euroko aurrekontua izango du, nahiz eta lehiaketa irabaziko duen enpresak 10 milioi gutxiago gastatuko duen, Eusko Jaurlaritzak 10 milioi euroko laguntza emango diolako estadioaren jabe den Anoeta Kiroldegia udal sozietateari.

Enpresa irabazleak urtean 257.000 euroko kakona ordaindu beharko dio Anoeta Kiroldegiari, estadioa 50 urtez ustiatuko balu. Diru kopuru hori txikiagoa izango da ustiaketa-urteak gutxitzen doazen heinean. 40 urterako baimena lortuz gero –hori da gutxieneko denbora-muga–, enpresak ez du inolako kanonik ordainduko.

Reala

Lehiaketara aurkeztuko den enpresetako bat Reala izango da ziurrenik. Futbol taldeak oraindik 19 urterako kontratua du sinatua Anoeta Kiroldegiarekin, eta lehiaketa beste enpresa batek irabaziko balu ere, eskubidea izango luke futbol partidak bertan jokatzeko.

Realak aurkeztutako proposamena:

Anoeta Kiroldegia

Anoeta Kiroldegiak urtean 16 egunez erabili ahal izango du Anoetako estadioa, sozietateak berak, Udalak edota baimendutako enpresek antolatutako ekitaldietarako.

Obrak amaitzean ere, Ernest Lluch kultur etxearen, Gipuzkoako Futbol Federazioaren eta Gipuzkoako kirol Federazioen egoitzen alokairuen diru-sarrerak jasotzen jarraituko du Anoeta Kiroldegiak. Obrek iraun bitartean bulego eta areto horiek Anoetatik kanpo eraman behar baldin badira, enpresa irabazlea egingo da gastuen kargu.

Bidaideak

Realak alboan izango du Kutxabank (El Diario Vasco)

Informazio gehiago:

Anoeta Kiroldegiak abenduaren 1ean onartuko ditu –ezusterik ezean– Anoetako estadioaren eraberritzerako lehiaketa arautuko duten pleguak (Donostia Gaur)