Velon: txirrindularitza “zirraragarri, egonkor eta sinesgarriago” baten aldeko apustuaren argi-ilunak

Atalak: Txirrindularitza

Negozio-lerro berria da Velon, ziklismoaren egonkortasun ekonomikoa bermatzea xede duen proiektua. WorldTour kategoriako 11 egiturek (%60ak) jarri dute egitasmoa abian, adierazi duten arren zabalik dituztela ateak, bai gainerako taldeentzat, baita bestelako eragileentzat ere.

Belkin Pro Cycling, BMC Racing, Garmin-Sharp, Lampre-Merida, Lotto-Belisol, Omega Pharma-Quick-Step, Orica-GreenEDGE, Team Giant-Shimano, Team Sky, Tinkoff-Saxo eta Trek Factory Racing taldeek sortu dute Velon, txirrindularitza “zirraragarri, egonkor eta sinesgarriago” baten alde lan egiteko asmoarekin. Beste kirol batzuen finantza-eredua ekarri nahi du txirrindularitzara, teknologia berriez gehiago baliatu eta jende gehiagorengana iristea, zale eta taldeen interakzioa bultzatuz eta bizikletetan kamerak jarriz, besteren artean.

Proiektuaren parte diren taldeen alde egingo du lan Velonek, negozio-ildo berriak sortzea helburu. Graham Barlett (UEFA, Nike eta beste kirol marka ezagun batzuetan lan egindakoa) izendatu dute zuzendari.

Proiektuaren aurkezpen bideoa:

https://www.youtube.com/watch?v=4twfy9mUb00

Egitasmoaren hiru printzipio nagusiak dira, Biciciclismo.com-ek laburbildu duen moduan:

1. Kirol zirraragarriagoa: lasterketa entretenigarriagoak, historia luzeko karrerak oinarri dituen egutegi koherenteagoarekin.

2. Teknologia berriak: lasterketak txirrindulariaren ikuspegitik erakustea, zaleek ikus dezaten bizikleta gainetik zer sentitzen den.

3. Talde egonkor eta sinesgarriak egituratzea, epe motz zein luzera. Ekonomia berri eta hobea sortzea, ekintza kolektiboen bitartez eta taldeen eta gainerako eragileen arteko elkarlana bultzatuz.

Luis Ramon Mendoza: “Zakur bera… lepoko berarekin”

“Velon, txirrindularitza hobea eginez” du lelo proiektu berriak. “Hain da eskaera logikoa, alde guztiek egin beharko luketela euren”, idatzi du Luis Ramon Mendoza kazetari eta Espainiako Txirrindularitza Federazioko komunikazio arduradunak bere blogean. “Baina, era berean, kolektibo zehatz batek sustatu duenez, hamaika bider zangotrabatuko dute, horretarako foro egokiak jada badaudela edo bilatzen den bakarra etekin propioa dela argudiatuta”.

Hiru printzipioei heldu die Mendozak artikuluan:

1. Kirol zirraragarriagoa. Mendozaren hitzetan argi dago World Tour egutegia ez dela jasangarria, baina kritiko agertu da egiten diren berrikuntza guztiek hura dutelako oinarri, “erabateko eraberritzea” behar denean.

2. Teknologia berriak: Eragile guztiak bat datoz puntu horretan, baina kamerek hartutako irudien eskubide/etekin ekonomikoen jabe nor izango den argi ez dagoela dio. Txirrindularia eta haren taldea? Lasterketa bera?

3. Elkarlana: “UCIko presidente Brian Cooksonek esan du pastelaren zati handiena nork eramango duen eztabaidan pasa direla urteak, eta egin beharrekoa pastel handiagoa sortzea dela. Batzuetan ahaztu egiten zaigu txirrindularitza ez dela 1 Formula bezalakoa, non eszenatokiak taldeen zerbitzura dauden. Gure kirolean, maila profesionalean bederen, antolatzaile eta taldeek pastelaren zati handiena eramateko borrokan aritu dira, ez hura handiagoa egiteko helburuarekin… Muturreko aldaketarik ezean, beldur gara horrela izaten jarraituko ez ote duen”.

Mendozak dioen moduan, printzipio horiek praktikara eramango dituzten ikusteke dago. Bera ez da oso baikor agertzen: “Ea hau ez den ohiko aditu-batzorde horietako bat, zaldiak behar direnean gameluak sortzen dituena. Urratsik ematen ez den bitartean, beldur naiz Velon ez ote den izango zakur bera… lepoko berarekin”.

Giant-Shimano taldeko John Degenkolb alemaniarraren bizikletan jarritako kamerak hartutako irudi ikusgarriak, aurtengo Kaliforniako Tourrean. Horrelako gehiago egin nahi ditu Velonek.

Sei talde, kanpoan

WorldTour kategoriako sei talde geratu dira, oraingoz, kanpoan: AG2R La Mondiale, FDJ, Team Europcar, Movistar Team, Katusha eta dopin zurrunbilo tristean sartua dagoen Astana.

Movistar taldeko manager nagusi Eusebio Unzuek adierazi du bat datozela Velonen hainbat printzipiorekin, baina oraingoz kanpoan mantenduko direla, Movistarren negozioaren parte batek telebista duenez oinarri, interes talka legokeelako haren eta enpresa berriaren artean.

Bestalde, FDJ talde frantziarreko buru Marc Madiotek esan du oraingoz nahiago dutela zain egon, eta gaineratu du, Unzueren ildotik, FDJ Frantziako Estatuak babesten duenez, enpresa atzerritar batean –Velonen egoitza Erresuma Batuan dago– inbertitzeak arazoak ekarriko lituzkeela.

Velon: “Hau ez da liga zatitzaile bat, NBA izan daitekeen moduan”

Enpresa berriak sortu dituen erreakzio batzuei erantzunez, bere asmoak berretsi ditu Velonek Twitter bidez:

1. Hau ez da liga zatitzailea, NBA izan daitekeen bezala.

2. Balioa eman nahi dugu, ez hartu.

3. Talde egonkorragoak nahi ditugu, denon intereserako delakoan: zale, txirrindulari, babesle, antolatzaile eta bereziki UCIrentzat.

4. Taldeek dute guztiok lasterketan sartzeko gakoa. Hori lortu nahi duen jendearekin elkarlanean aritu nahi dugu.

5. Uste dugu txirrindularitza zoragarria dela. Hobea izaten lagundu nahi dugu.

Informazio gehiago:

Proiektu berriaren helburuez Velonews.com webgune espezializatuan. Hainbat datu ematen du Neal Rogers kazetariak, Graham Barlett Veloneko zuzendari orokorraren azalpenetan oinarrituta, besteak beste taldeen aurrekontuaren %95 babesleek jartzen dutela, eta Velonek egoera hori irauli nahi duela.

Graham Barletti elkarrizketa Cyclingtips webgunean (1. zatia), egitasmoaren nondik norakoez.

Graham Barletti elkarrizketa Cyclingtips webgunean (2. zatia), txirrindularitzaren egoeraz oro har (UCI, dopina…).

Negozioa handitzea helburu, Fran Reyesen A rueda blogean.