Osasunak “faborezko traturik” ez duela jaso frogatu beharko du Nafarroako Parlamentuak

Atalak: Osasuna

Sadar futbol zelaiaren kudeaketari buruzko informazioa ere eman beharko du Parlamentuak (Argazkia: Siempre rojillos)

Osasunak duen 53 milioi euroko zorraren berregituratze-legeari buruzko txostena osatu beharko du Nafarroako Parlamentuak, Europar Batzordeak (EB) hala eskatuta, norbanako batek jarri duen salaketaren harira. Futbol taldeak “faborezko traturik” ez duela jaso frogatu beharko du Parlamentuak, zorra kitatzeko modua ezin daitekeela “Estatu laguntza” gisa interpretatu, zeina EBko legediaren aurka joango litzatekeen, Osasuna talde pribatua den heinean. Hogei eguneko epean aurkeztu beharko du txostena.

Nafarroako Parlamentuak –UPN, PSN eta PPren botoekin– azaroaren 27an onartu zuen Osasuna taldeak Foru Ogasunarekin zuen zorraren –53 milioi euro– parterik handiena kitatzeko foru legea. Hura babestu zuten alderdiek adierazi dute legerik ez dela urratu. Gainerakoek, aldiz, “arduragabekeria” egotzi diete, eta Gobernuak aurrez txosten juridikorik egin ez izana kritikatu dute, Diario de Noticias egunkariak jaso duen moduan.

Gaiari buruz blogean:

Osasunari zorra “barkatu” dio Nafarroako Parlamentuak: politikarien erreakzioak (2014-11-28)

Zorra kitatzeko ondasun guztiak eman ditu Osasunak. Estatu laguntza al da? (2014-11-14)

Informazio gehiago:

Cesar Krutxaga, Osasunako jokalari ohiak Berrian: “Lehen Mailan edonola jarraitzea garesti ordaintzen ari da Osasuna” (2014-12-16)