Klima aldaketaren eragina tenisean eta beste kirol batzuetan
Teniseko lau txapelketa handienak –Grand Slam delakoa osatzen dutenak– hartzen dituzten hirietako tenperaturak geroz eta altuagoak dira. 1968az geroztik, batez besteko tenperatura beroenak gorantz egiten ari dira etengabe, klima aldaketaren adierazgarri dena, AEBetako Climate Central erakundeak ohartarazi duenez. Plazaratu dituen grafikoek argi erakusten dute igoera, Parisen jokatzen den Roland Garros edo Frantziako Irekiaren kasuan bereziki.
[55º F = 13º C inguru / 70º F = 21º C / 85º F = 30º C]
Kasualitatez, Rafael Nadal tenislariak Melbournen (Australia) jokatutako partida batean deshidratazioa sufritu eta kazetariak klima aldaketari begira jarri diren une berean kaleratu dituzte datuak.
Tenisean soilik ez
Tenisa ez da tenperatura geroz eta beroagoen ondorioak sufritzen dituen kirol bakarra. Kriosfera (izoztua dagoen lur-eremua) urtzen ari da pixkana-pixkana, eta atmosferaren baldintzak aldatzen ari dira berotegi-efektua eragiten duten gasen ondorioz, Climate Centralek nabarmendu duenez.
Txakurrek bultzatutako Alaskako Iditarod trineo lasterketan, esaterako, elur geroz eta gutxiago dago; AEBetako izotz gaineko hockey liga nazionaleko arduradunak kezkaturik daude, jokalari gazteek entrenatu ohi duten estali gabeko pisten egoeragatik; berdin futbol amerikarreko prestatzaileak, udaberrian –orduan hasten dituzte entrenamenduak institutu eta unibertsitateetako atletek– egiten duen bero sapa handiagatik; Everest igotzea geroz eta arriskutsuagoa da, izotz blokeak ezegonkorragoak direlako; etorkizunean hiri gutxiagok antolatu ahal izango dituzte Neguko Joko Olinpikoak; eta bada esaten duenik ere beisbol jokalariek home run gehiago lortzen dituztela klima aldatzen ari delako, airea finagoa denez, pilota urrunago jaurtitzea dagoelako, alegia.
Informazio gehiago:
Iruzkinik ez
Trackbacks/Pingbacks