Izkiko golf zelaiaren zuloa Diputazioak estali du… urtero bezala

Atalak: Ekonomia

@GorkaOrt_Guinea Arabako Batzar Nagusietako Bilduko bozeramailearen txioak ohartarazi gaitu: “358.000 euro bideratu ditu Arabako Diputazioak Naturgolf sozietatera, [2015eko] galerak konpentsatzeko. Urtero berdin”.

Urtero urtero milaka euro bideratzen du Arabako Diputazioak Izkiko golf zelaira, haren defizita estaltzeko.

Lagran eta Urturiko golf zelaiak kudeatzen ditu Naturgolf sozietate publikoak. Bi zelai horiek “Complejo Izki Golf” delakoa osatzen dute. Lagranekoa, dena den, itxi egin dute.

Eta egia da, aizue, urtero berdin:

– Lotura estua golf zelaien eta etxebizitza-guneen artean (2006, Gara)
– Mikel Mintegi (EA): “Urturi eta Lagraneko zelaiak hutsik daude eta gainera Diputazioak ordaintzen ditu” (2006, Diario de Noticias de Alava)
– Izkiko kirol-gunearen defizita 500.000 euro baino handiagoa da. (2010, El Correo)
– Diputazioak onartu du Izki Golf-ek urtean 500.000 euroko galerak dituela (2010, El Correo)
– Kontua “askoz ere lehenagotik datorrela” dio Malentxo Arruabarrena Kultura eta Kiroletako diputatuak (2011, El Correo)
– Diputazioak urtean 500.000 euro bideratzen ditu Izkiren defizita arintzeko. (2011, El Correo)
– Diputazioak urtebeteko epea hartuko du Izkiko golf zelaia hondotik ateratzeko (2012, El Correo)
– Lagraneko golf zelaiaren itxieraren inguruko zalantza agertu du Bilduk (2013, Gasteiz Hoy)*

* Lehen 500.000 euro bideratzen zituen Diputazioak. Aurten 358.000 euro. Bi kopuruen arteko aldeak bat egiten du Lagraneko zelaia itxita aurreztutakoarekin: 150.000 euro inguru.

Izki ingurura bizpahiru telefono dei egin ostean jakin dugu Severiano Ballesterosen Trajectory enpresak diseinatu zuela golf zelaia. Inauguraziora (1994an) ere gonbidatu zuten golf jokalari espainiarra, baina gehitxo kobratzen zuenez, azkenean ez ekartzea erabaki zuten tokiko agintariek.

Tokiko agintariek, zeintzuk nahiago duten “kirol profesionala laguntzea, Baskonia eta Alaves kasu, oinarria babestea baino”, esan digu solaskideetako batek. “Golf zelaiak diru mordoa jasotzen du lau katuk jokatu ahal izan dezaten, eta herriko frontoiak itoginak ditu, umeak aritzen diren futbol ateetako sareak guk josi behar izaten ditugu… Diru hori bideratuko balute beste kirol jarduera batzuk laguntzeko… Garai batean gauza bera gertatzen zen Martin Fiz edota Juanito Oiartzabalekin, Arabaren izena mundu osora zabaltzen zutelako aitzakiarekin”.

Izkiko golf zelaia dagoen lur-saila erabilera publikorako mendia zen (deskatalogatu egin zuten gero), luberria, laborantzara bideratua. Bertako nekazariek patata ereiten zuten, nematodo izeneko gaitza agertu zen arte. Arabako Diputazioak bi aukera jarri zituen mahai gainean orduan: Lur-sail horietan granja edo abeltegiak jartzea –bakoitzak hautatutako animaliekin–, ala zonaldea “suspertuko” lukeen golf zelaia eraikitzea. Bigarren aukera gailendu zen.

Hortik aurrerakoak imajina ditzakegu: golf eskola, ostatu berriren bat, jatetxea… Baina horrek guztiak suspertu al du zonaldea? “Ez”, erantzun digu solaskideetako batek. “Bakarren batzuk -leku egokian lagun aproposak dituztenak- agian aberastuko ziren, baina… Batez ere Bernedon egoitza duen Biomendi laborategiak mantentzen du zonaldea bizirik. Hotela-eta… apenas etortzen da jenderik. Badakizu, baina, herri txiki infernu handi. Zu PPkoa izanik proiektu hau edo beste sustatzen baldin baduzu, ni EAJrekin joango naiz, zure kontra egiteko besterik ez bada. Kontua da hasieratik defizitarioa den golf zelaiak hor jarraitzen duela. Belarra ongi mantentzea hain da garestia (ur gastuak-eta), eta hain jende gutxik jokatzen du… Diputazioak horregatik lagundu behar du urtero urtero Naturgolf sozietatea”.

Diputazioak berak, Bernedo eta Lagraneko udalek eta Urturiko administrazio batzarrak osatzen dute sozietatea.

Golf zelaia 1994an inauguratu zen, Arabako ahaldun nagusia EAJko Alberto Ansola zenean.

Informazio gehiago:

Arabako Aldizkari Ofiziala. Ikusi 12/2015 akordioa.