Euskal selekzioko mendi korrikalariekin saio irekia Zumarraga-Urretxun

Atalak: Mendia

Areizaga-Kalebarren plazatik abiatuko dira korrikalariak, 8:45ean.

Datorren igandean, otsailak 22, mendi lasterketetako Euskal Selekzioko kideak Zumarraga eta Urretxun izango dira. Entrenamendu gisa, maiatzaren 23an egingo den UZTRAIL lasterketaren ibilbide eraberritua osorik beteko dute, edonorentzat irekia dagoen korrika saioan.

Ez dago izena eman beharrik, ezta ezer ordaindu beharrik ere. Goierri Garaia mendi lasterketako kideek jakinarazi dute anoa-gune txiki batzuk jarriko dituztela 22 kilometroko ibilbidean. Aukera benetan polita da selekzioko atleten alboan korrika egin eta haien gomendioak mendian bertan entzuteko.

Aritz Egea urretxuarra selekzioko kidea da, eta bere eskutik etorriko dira gainerako kirolariak: Hassan Ait Chau, Iban Letamendi, Leire Agirrezabal, Aitziber Ibarbia eta Uxoa Irigoyen. Jokin Lizeaga eta Elena Calvillo ere selekzioko kide dira baina beste konpromiso batzuk tarteko ez dute gure artean egoterik izango.

UZTRAIL, berrikuntzekin

Goierri Garaia taldeko kideek azaldu dutenez, izena bera ere aldatu diote lasterketari. “Goierri Garaia mendi lasterketa izatetik UZTRAIL izatera pasa da, erakargarriagoa egite aldera”.

Halaber, lasterketan pista eta asfalto asko zegoela-eta, partehartzaile asko kexu ageri ziren aurreko urteetan. Haien hitzak aintzat hartu eta aurtengo ibilbideak “oso asfalto gutxi” izango du. Horrez gain, gogortasuna ere gehitu diote probari: “Gure mendietan, tamalez, ez dago kilometro bertikalak egiteko aukerarik, baina Izazpi eta Irimo aurpegirik pikoenetatik igoko dira, eta horrek gogortasuna areagotuko du”.

Aurtengo probak 22 kilometro luze eta 1600 metroko desnibel positiboa izango ditu. Ibilbide laburxeago bat ere egin ahal izango da, 11 kilometrokoa. Izen-ematea zabalik dago jada.

UZTRAIL lasterketak Izazpi eta Irimo pasako ditu. Ibilbide laburra 11. kilometroan amaituko da.

Informazio gehiago: UZTRAIL Facebooken.