Brasil: Luxuzko hotel olinpikoa izan beharko litzatekeena, etxerik gabekoek okupatua

Atalak: Brasil, Joko Olinpikoak

Hilaren 7an okupatu zuten eraikina (Argazkia: AP Photo / Silvia Izquierdo)

Abandonatutako eraikin handi bat okupatu dute ehun bat lagunek Rio de Janeiro hiriko Flamengo auzoan. Agintariek etxebizitza bat eman bitartean hantxe jarraituko dutela adierazi dute.

Eike Batistak, Brasilgo pertsonarik aberatsena izandakoak, erosi zuen urtetan Flamengo futbol taldearena izan zen eraikina, Hilton kateko luxuzko hotel bihurtzeko asmoz. Han bizi ziren herritarrak 2012an kaleratu zituzten, “Batistak eraikitako meatzaritza, energia eta petrolio inperioa” gainbeheran hasi zenean, albiste agentziek nabarmendu duten moduan. Informazioa pribilegiatua bidegabe baliatzeaz akusatuta, iazko azaroan hasi zen bere aurkako epaiketa.

Azken lau urteotan, ordea, eraikinean ez da obrarik egin, hura eraberritu behar zuen enpresak hondoa jo zuelako.

2016ko Joko Olinpikoak, pozoindutako karamelua

Batistaren eta Brasilgo agintarien asmoa zen hotela 2016rako zabalik izatea, Rio de Janeirok ez duelako behar adina leku Joko Olinpikoak ikustera joango den bisitari andanari ostatu emateko. 2009an, 2016ko Jokoak jasoko zituela jakin genuenean, beharrak asetzeko beharko liratekeen 40.000 oheen erdia besterik ez zuen Riok.

Turistentzat soilik ez, bertako herritarrentzat ere geroz eta zailagoa da bizitoki merke samarra topatzea, hiriaren hazkunde ekonomikoa dela-eta, zeina elikatu duten kostatik hurbil aurkitutako petrolio putzuek, eta 2014ko Munduko Futbol Kopak eta 2016ko Joko Olinpikoek hauspotutako espekulazio urbanistikoak.

Futbol Koparen ingurumarian, herritar pobreenak interes-guneetatik (futbol estadio inguruetatik) aldendu eta klase ertaina erakarri zuten gentrifikazio prozesuak eman ziren Brasilgo hainbat hiritan; eta oraindik ere, Joko Olinpikoak aitzakia, giza-mugimenduek ez dute akaberarik izan.

Iazko datuen arabera, 180.000 lagun kanporatu zituzten euren etxeetatik –gehientsuenak faveletan bizi ziren–, beharrezko azpiegiturak eraikitzeko. Haietako batzuk periferiako zonaldeetan birkokatu zituzten; beste askok ez zuten izan nora jo.

Hain justu, Rio de Janeiroko eraikina okupatu duten pertsonak hiri erditik kanporatu zituzten duela gutxi. Agintariek etxebizitzarik bermatzen ez dieten bitartean ez dutela alde egingo adierazi dute.

Informazio gehiago:

– “Maracana estadioa, Eike Batista handiki brasildarraren esku” (2013-05-09 / BBC)

– Eike Batistari buruz Wikipedia eta Forbes webguneetan.