“Madrilgo Beti-Jai frontoiaren alde borrokan jarraitu behar dugu”

Atalak: Azpiegiturak, Pilota

Joaquin Rucoba arkitektoak diseinatu zuen Beti Jai. Bilboko Udala ere hark egin zuen. Irudiotan, frontoiaren argazki zahar bat, eta gaur egun duen itxura tamalgarria.

Beti Jai pilotalekua, 1894ko jatorrizko egitura mantendu baina egoera oso txarrean dagoena, Madrilgo Udalak eskuratu berri du. 7 milioi euro ordaindu ditu azkenean, frontoiaren jabeak, Tarcosul enpresa gipuzkoarrak, 12 milioi eskatzen zituen arren.

Pilotalekuaren kontserbazio eta eraberritzearen alde diharduen herri-plataformak txalotu egin du albistea, baina ohartarazi du “borrokan” jarraitu beharra dagoela frontoiak bere kirol-izaearari eutsi diezaion, taldeko bozeramaile Igor Gonzalezek Diario.es agerkarian adierazi duenez.

Plataformak azaldu du Udalak oraindik ez duela zehaztu frontoiari zein erabilera emango dion –espekulazio urbanistikoaren mamua etengabe agertzen da–, ezta eraberritze edo gutxienez mantentze lanei (noiz) helduko dien ere.

Hiru proposamen egin ditu taldeak:

1. Beti Jai pilotalekuak erabilera publikoa izatea, haren kudeaketa pribatua izanik ere.

2. Espazio autofinantzatu eta jasangarria izatea.

3. Pilota partidez gain, bestelako kirol eta kultur ekitaldiak jasotzeko egokitzea: futbol edo saskibaloi partiduak, antzerki emanaldiak, kontzertuak, herri-bazkariak, batzar irekiak eta abar.

 Dokumentala

Hilaren 30ean Beti Jai, la capilla sixtina de la pelota (Beti Jai, pilotaren Kapera Sixtinoa) dokumentala estreinatuko dute Madrilen. Proyecto Family ekoizpen-etxeak egin du, Richard Zubelzuk zuzenduta, herri-plataformarekin elkarlanean. Frontoiaren historia eta haren balio arkitektonikoa ditu ardatz.