“Arrazakeria gogor borrokatuko du FIFAk”. Eta Israel? “Ez futbola politizatu, faborez”

Atalak: Futbola, Palestina

“Arrazakeriaren kontra” omen dago futbola, joko garbiaren alde… (Argazkia: Uefa.com)

“Diskriminazioaren aurkako borrokan urrats berria emango du FIFAk: 2018an Errusian jokatuko den Munduko futbol Koparako sailkapen faseko partiduetan bigilantzia sistema berria hasiko gara erabiltzen, arrazismoaren aurkako FARE erakundearekin elkarlanean”, irakurri dugu Nazioarteko Federazioaren webgunean. Zenbait begiralek gertutik zelatatuko dute zaleen eta gainerako protagonisten jokabidea, bideokamera bidez-eta, diskriminazio zantzurik balego frogak FIFAren diziplina-batzordera bidali eta hark egoki ikusten badu, zigor-prozedura hasi ahal izateko.

“Bigilantzia sistema berriak mezu argia helarazten du: futbolak aniztasunaren alde eta diskriminazio ororen aurka egingo du”, adierazi du FIFAko presidente Joseph S. Blatterrek.

“Arrazismoa eta diskriminazioa borrokatu ahal izateko tresnak eskaintzen ditu sistema berriak”, gaineratu du erakundeko presidente-orde Jeffrey Webbek.

Bien bitartean, ordea, FIFAk geldiarazi egin nahi du Israelgo futbol federazioa (IFA) “arrazakeriagatik” kanporatua izan dadin Palestinak egindako eskaera (Eldiario.es).

Duela hilabete idatzi nuen eskaera horri buruz. Palestinako futbol federazioak salatu du FIFAren araudia hiru zentzutan urratzen duela Israelek: palestinarren aurkako eraso arrazistak –Israelgo futbolean– ez ditu zigortu, bere ligan israeldar kolonietako bost talde mantentzen ditu, eta Palestinako federazioaren independentzia oztopatzen du.

Maiatzeko kongresuan aztertuko du FIFAk Palestinaren eskaera. Ebazpenak aurrera egiteko, beharrezkoa izango da Kongresuko 209 kideetako %66ak babesa ematea, gaur gaurkoz zail samarra dirudiena. Zentzu horretan, Europako futbol federazioko (UEFA) presidente Michel Platinik adierazi du Israel babestuko duela. “Futbola ez da politizatu behar”, erantzun du auziari buruz galdetzean.

Ulertu dugu. Futbol palestinarrari eraso egitea ez da politika, futbola baizik; Israel horregatik zigortzeko eskatzea, ordea, ez da futbola, politika baizik…

Platiniren antzeko terminoetan mintzatu da Israelgo federazioa (IFA): “Kirola eta politika nahastu nahi dituzte; IFAk bere esku dagoen guztia egin du Palestinar Aginteak kirol jarduera egokia garatu ahal izateko. Futbolak zubi lana egin behar duela uste dugu, bi herriak hurbiltzeko tresna izan behar duela. Palestinarren boikot eskaerak egoera zaildu besterik ezin du egin. Blatter eta Platini Israelen lagun handiak dira, ez dugu zalantzarik babestu egingo gaituztela”. Guk ere ez…