Ipar Euskal Herriko bi errugbi taldeek ez dute bat egingo

Atalak: Errugbia

[Eguneraketa, 2015-05-19]

“Azken egunetako giro bortitza ikusirik”, Baionako presidente Manu Merinek gelditu egin du Miarritzerekin bat egiteko proiektua, Berriako kazetari Eneritz Zabaletak azaldu duen moduan:

“Manu Merinek, negarra begian eta eztarria unatua, denek itxaroten zuten albistea eman zuen. ‘Hurrengo sasoian bi talde profesional egonen dira Euskal Herrian: Baiona eta Miarritze’. Lehenago, baina, azken egunetako giro ozpindua aipatu zuen. ‘Mehatxuak jaso ditut. Nik, nire enpresak eta nire familiak. Nire enpresaren atean segurtasun zaindariak jarri ditut. Nire autoari harriak bota nahi izan dizkiote. Kalean gelditu naute. Nire 8 urteko ilobengana joan dira, garrasika’. Iragan sasoiaren antzera, zaleen kexuek eta gehiegikeriek bertan behera utzi dute proiektua. (…) Bitartean, galderak dira nagusi. Baiona eta Miarritzeren finantza egoera larria da oso: Miarritzek 1,7 milioi euroko zuloa omen dauka, eta Baionak, bi milioi eurotik gorakoa. Taldeko babesle nagusiak zirenek —Alain Affleouk eta Serge Kampfek— bi euskal taldeak bateratzea eskatu dute zuloa estaltzeko baldintza gisa. Ikusi beharko da orain zer gertatuko den”.

[Eguneraketa, 2013-12-18] 

Miarritzek eta Baionak bat egiteko proposamena bertan behera geratu da. Unai Zubeldiak Berria egunkarian plazaratutako artikulutik hartu dut honako pasartea:

“Ezetz, urdina gorriarekin ezin dela nahastu. Zelaiko lokatzetan trabatuko litzatekeela proiektua. ‘Ezin dut gure kluba, juridikoki, ekonomikoki eta fiskalki sendoa dena, bide itsuan engaiatu’. Hortxe Alain Afflelou Baionako presidenteak Baiona eta Miarritzeren arteko bat egiteari joan den astean eraiki zion horma. ‘Duela egun batzuk Serge Blancok [Miarritzeko presidentea] segurtatu zidan Miarritzeren finantza egoera ona zela. Baina bestelako informazioa daukat orain’. Astebeteko gezur txiki bat izan zen dena.

[Jatorrizko albistea, 2013-12-06]

“Biarritz Olympique eta Baiona errugbi klubetako presidenteek, eta haien babesle nagusiek (Capgemini, Alain Afflelou), euskal izaeradun talde bakarra osatzeko aukerak aztertuko dituzte. Aurrera begirako elkarrizketa eta analisiek emango dizkigute balizko proiektuaren bideragarritasunari buruzko argibideak”.

Biarritz (zuri-gorriz) eta Baionaren (zuri-urdinez) arteko derbirik ez al da izango aurrerantzean? (Argazkia: Sud Ouest)

Bi taldeek plazaratutako prentsa-oharrak errugbi mundua astindu du -elkar gehiegi maitatzen ez duten taldeak dira Biarritz eta Baiona- , baina badira arrazoiak bateratzearen berri orain emateko, Laurent Zègre kazetariak Sud Ouest agerkarian azaldu duen moduan:

Izaera administratibo berria

“Fusio” terminoa ekidin duten ordezkarien hitzetan, bi klubek lau hilabeteko epea dute egitasmoaren bideragarritasunari buruzko auditoria egin eta datorren denboraldian Top14an elkar helduta lehiatzerik izango luketen jakiteko. Ondoren erabakiko dute proiektuari zein izaera administratibo eman, bi kluben historia aintzat hartuta. Bakoitzaren identitate berezia medio, ezinezkoa dirudi talde batek bestea xurgatzea. Ziurrenik hirugarren elkarte bat sortuko dute.

Zergatik orain?

Top14 ligaren sailkapenari begiratzea besterik ez dagoela dio kazetariak. Hamabigarrena da Baiona, eta azkena Biarritz. Liga gogorra da Frantziakoa, aurrekontu handia eskatzen duena, eta jaitsieraren amildegian behera ez jausteko, Baionak eta Miarritzek ezinbestekoa dute haien diru-poltsak handitzea.

Aurrekontuen sailkapenean, zortzigarrena da Baiona (18 milioi euro), eta hamargarrena Biarritz (ia 17 milioi euro). “1+1 ez dira beti 2, baina errazago lortuko dugu elkar helduta”, adierazi du Alain Afflelou enpresariak.

Zein izen izango du? Zein kolore? Non jokatuko du?

Galdera horiek airean daude oraindik. Datozen hilabeteetako elkarrizketek esango dute bi taldeak adostasun batera helduko diren ala ez; eta klubetako agintari, babeste eta zaleak kezkatzen dituzten kontuen inguruko erabakiak zeintzuk aseko dituzten, eta zeintzuk haserrarazi. Gaur gaurkoz, Sud Ouest-en galderari (“Fusioaren alde al zaude?”) erantzun dioten internauten %58ak baietz esan du, eta %33ak ezetz (%9ak ez dakiela erantzun du).